Mbi 100 mijë fëmijë rrëzikojnë të vriten nga bombardimet e vazhdueshme në Alepo të Sirisë. Është ky alarmi që jepet nga organizata për mbrojtjen e fëmijëve në Kombet e Bashkuara UNICEF. Zëdhënësi i UNICEFit për Gjermaninë, Rudi Tarneden në një intervistë për mediat gjermane e krahasoi rrezikshmërinë, në të cilën vihet çdo ditë jeta e fëmijëve dhe banorëve të tjerë të Alepos, me masakrat e Luftës së Dytë Botërore.
Në total janë rreth 250 mijë banorë të Alepos që jetojnë zonat ku çdo ditë avionët rusë dhe ushtria e presidentit Bashar al Asad bombardojnë pozicionet e rebelëve. Ndaj dhe UNICEF kërkon ndalimin e menjëhershëm të luftimeve atje.
Jashtëzakonisht të ashpra ishin kritikat e ambasadores amerikane në Kombet e Bashkuara, Samanta Pauer për Rusinë. Pjesëmarrëse në mbledhjen e jashtëzakonshme në Këshillin e Sigurimit të kësaj organizate, Pauer i konsideroi “barbare” bombardimet që avionët rusë po kryejnë në Alepo, në mbështetje të ushtrisë së Asadit.
Ndërsa ambasadori britanik Mattheë Rycroft i cilësoi bombardimet si krime lufte. Sipas raportit të të dërguarit special të Kombeve të Bashkuara në Siri, Stafan de Mistura, rusët dhe trupat e Asadit po hedhin bomba jashtëzakonisht të fuqishme në Siri, që shkatërrojnë bunkerë dhe që sipas tij janë aq të fuqishme saqë e bëjnë natën ditë.
Ambasadori rus në Kombet e Bashkuara, Vitali Çurkin u kundërpërgjigj duke akuzuar Shtetet e Bashkuarase kanë dështuar në ndalimin e aktivitetit të grupeve rebele. Sipas tij, Rusia dhe trupat e Asadit po bëjnë të pamundurën për të shmangur sa më shumë civilët, por rebelët po i përdorin ata si mburojë njerëzore.
Sesioni i jashtëzakonshëm i Këshillit të Sigurimit në Kombet e Bashkuara u thirr nga Shtetet e Bashkuara, Britania dhe Franca, pas dështimit të armëpushimit, për të cilin u ra dakord në fillim të këtij viti. Që prej nisjes së ofensivës kundër rebelëve, në Alepo janë vrarë mbi 200 civilë, mes të cilëve gra e fëmijë.
Gjatë 48 orëve të fundit, në Siri kanë mbërritur 71 kamionë me ndihma humanitare nga Kombet e Bashkuara të prekura nga luftimet e ashpra. Ndihmat janë të destinuara për rreth 60 mijë banorë të disa zonave pranë Damaskut.
