Uellsi ka shkaktuar befasinë më të madhe në çerekfinale të evropianit të futbollit dhe ka bërë histori duke u kualifikuar për herë të parë në gjysmëfinale të kësaj gare prestigjioze për kombëtaret.
Uellsi triumfuan para shikuesve në stadiumin Stade Pierre-Mauroy kundër Belgjikës me rezultat 3:1.
Uellsianët luajtën një lojë të fortë në mesfushë, ndërsa belgët pas shënimit të golit të parë më nuk treguan pothuajse asgjë në këtë takim.
Në fakt, belgët kaluan në epërsi të parët përmes futbollistit të Romës, Radja Nainggolan. Ky i fundit dërgoi një goditje të fuqishme prej rreth 30 metrave në minutën e 13-të takimit, e cila ishte e papërballueshme për portierin, Hennessey.
Por, pas shënimit të golit të parë më belgët nuk treguan se e meritonin të shkonin në gjysmëfinale të Euro 2016, raporton Telegrafi.
Uellsianët iu deshën 18 minuta kohë që të barazonin rezultatin për të bërë më tutje edhe përmbysjen e madhe.
Pas një rivënie këndore të mesfushorit Aaron Ramsey, i cili harkoi saktë për tek qendërmbrojtësi Ashley Williams, këtij të fundit i mbeti të realizoi vetëm gol me kokë dhe kështu pjesa e parë përfundoi, 1:1.
Hal Robson-Kanu pasi mashtroi dy mbrojtës belg në minutën e 55-të takimit, mbeti i vetmuar përballë portierit dhe me një goditje të saktë prej tetë metrave, kaloi në epërsi uellsianët.
Kur pritej të përfundonte takimi, në të 85-tën minutë Sam Vokes realizoi golin e tretë dhe të “Knock-out” për belgët dhe kështu, ndeshja përfundoi 3:1 për Uellsin.
Pas kësaj fitore, Uellsi në gjysmëfinale do të takohet me Portugalinë, e cila eliminoi mbrëmë pas penalltive Poloninë. Kjo njëkohësisht do të jetë përballja e parë mes dy futbollistëve të Real Madridit, Gareth Balet dhe Cristiano Ronaldos. /Telegrafi/
