Aktualitet

‘U shmang katastrofa ajrore’/Gjenerali:Pse hesht ministria, SPAK të hetojë


Bëhu pjesë e Grupit Zyrtar të Opinion.al
>> KËTU <<
               Publikuar në : 14:37 - 11/08/20 |
Al Do

Një helikopter i Forcave Ajrore të Shqipërisë bëri ulje të detyruar në rajonin e Peskarës në Itali. Mediat vendase raportuan lajmin duke cituar autoritetet se “shkathtësia e pilotëve shmangu një katastrofë ajrore”.

Ministria e Mbrojtjes në  Shqipëri ende nuk ka dalë me një informacion zyrtar lidhur me ngjarjen. Sipas ish-zëvëndës Shefit të Shtabit të Përgjithshëm të Forcave Ajrore, gjeneral Piro Ahmetaj, i cili aktualisht është Këshilltar për Sigurinë Kombëtare në PD, pas këtij incidenti qëndrojnë tendera korruptivë të cilët kanë lidhje me mirëmbajtjen e helikopterëve.

Për këtë arsye ai i kërkon SPAK të hetojë dhe i ka drejtuar 12 pyetje ministrisë.

“Pyetja kritike mbetet nëse merret në konsideratë “pesha e rrezikut” për jetën e pilotëve ?!”, shkruan gjenerali.

Ai pyet se pse është ndërprerë kontrata e shërbimeve të mirëmbajtjes me kompaninë gjermane “Airbus”, e cila prodhon këtë tip helikopteri dhe pse kontrata është lidhur me “Artelis SAS”. “Kush është cilësia, si dhe sa është në total (përfshirë dhe transportin) diferenca e kostos me kompaninë Airbus ?!”, shkruan gjenerali.

Ndër 12 pyetjet që gjenerali Piro Ahmetaj ka ngritur, për të ndihmuar nëse nisin hetimet, është edhe ajo që tregon se prej dy vitesh, funksioni i Komandantit të Forcave Ajrore (si dhe FD) ushtrohet nga Zëvëndësi, gjë që sipas tij është shkelje e Kushtetutës.

POSTIMI I PLOTE

Në dt. 30.07.2020, mediat Italiane informuan se “falë aftësisë së pilotëve, u shmang tragjedia”, një helikopter i Forcave Ajrore të RSH bëri ulje emergjente në rajonin e Peskarës, Itali.

Lajmi i shoqëruar me foto nuk linte asnjë dyshim për keqinterpretim nga profesionistët, apo qoftë edhe për zyrtarët që vjedhin edhe duke rrezikuar seriozisht jetën e pilotëve, kapacitetet kritike të FA dhe pasurinë kombëtare (Helikopteri COUGAR me vlerë 17 milionë €uro).

Mbas këtij lajmi, një ekspert i përgjegjshëm i forcave ajrore më ka informuar në mirëbesim se një kontratë korruptive dhe kriminale njëherësh fshihet pas këtij rasti !!

Për të ndihmuar organet e drejtësisë (SPAK), dhe nisur menjëherë hetimet, kam ndërtuar 12 pyetje publike dhe fare të thjeshta ndaj institucionit të Ministrisë së Mbrojtjes (MM):

Pse MM dhe Autoritetet Ushtarake përgjegjëse vijojnë të mos kenë asnjë deklaratë zyrtare për këtë prag-tragjedi me jetën e pilotëve dhe helikopterin?!

Pse është ndërprerë kontrata e shërbimeve të mirëmbajtjes me kompaninë e mirënjohur gjermane “Airbus” (kompania prodhuese e këtyre helikopterëve), dhe cilat janë arsyet që kjo kompani është larguar nga Rinasi (RSH), pas rreth 8 vitesh shërbimesh b?!

Kush është kontrata zyrtare e lidhur me kompaninë Franceze “Artelis SAS”, e cila është më së shumti për transportin ajror në ndërtimin e linjave elektrike dhe teleferikëve, etj ?!

Kush është kostoja e shërbimeve të helikopterëve nga “Artelis SAS”, kush është cilësia, si dhe sa është në total (përfshirë dhe transportin) diferenca e kostos me kompaninë Airbus ?!

Kush janë arsyet ekonomike që helikopterët transportohen me trajler nga Shqipëria në Francë, dhe sa është kosto shtesë ?!, pasi ky është një rast unikal në botë, jo vetëm për koston e transportit që i mbivendoset asaj të mirëmbajtjes, por për prestigjin e një shteti !!

Kush do të përgjigjet për dëmin ekonomik (përshi transportin ?), kompania “Artelis SAS” apo shteti shqiptar?! Akltualisht helikopteri COUGAR ka një kosto dëmi tepër të lartë për t’u transportuar dhe riparuar përsëri.

A e ka ky helikopter uljen e dytë të detyruar (edhe para tre javësh?), dhe a është rikthyer te kompania Franceze “Artelis SAS” (?), Si, sa dhe kush e ka përballuar koston shtesë ?!

Sipas ekspertëve italiane “shkathtësia e pilotëve shmangu një katastrof ajrore”, dhe pyetja kritike mbetet nëse merret në konsideratë “pasha e rrezikut” për jetën e pilotëve ?!

A janë pilotët të certifikuar, me eksperiencë fluturimi në lartësi të ulëta dhe mbi ujë (?); ka shkelje të rregullave të fluturimit, të shërbimeve të mirëmbajtjes, karburantit, etj ?!

A vazhdon të jetë në “arat e Pescarës”, Itali, helikopteri, kush janë procedurat standarte dhe praktika e plotë e kontratave të mirëmbajtjes së helikopterëve të Forcave të Armatosura ?!

A janë pezulluar gjatë vitit 2018 nga puna për 8 muaj, 6 specialistë përgjegjës per shërbimet e mirëmbajtjes së helikopterëve në bashkepunim me kompaninë Airbus ?!

Pse MM prej 2 vitesh, shkelë me dy këmbët Kushtetutën (pika 1, neni 168 dhe pika 3, neni 169) dhe funksioni i Komandantit të Forcave Ajrore (si dhe FD) ushtrohet nga Zëvëndësi ?!

Në shtesë, sjellim në kujtesë rrëzimin e helikopterit në Liqenin e Shkodrës, para 4 vitesh, ku humbën jetën dy pilotë, të cilët MM dhe Qeveria i dekoroi “nxitimthi” dëshmorë të Atdheut.

Po a mjafton vetëm dekorimi si përgjegjësi shtetërore (?), për të mjekuar dhimbjen, mësuar nga gabimet dhe ndëshkuar zyrtarët e korruptuar, në mënyrë që rastet fatale të mos përsëriten ?!

Drejtësia ende nuk ka folur, nëse ka patur hetim rreth këtij aksidentit fatal, kush janë përgjegjësit për dy jetët e humbura si dhe shkatërrimin e pasurisë kombëtare (Helikopterin EC-145) ?!

Në përmbledhje të sa më sipër, shpresoj që SPAK do ta hetojë me përparësi këtë rast si dhe do ti çojë përpara ligjit zyrtarët e papërgjegjshëm, që të verbuar nga babëzia për të vjedhur çka mbetur, kanë rrezikuar seriozisht jetën e pilotëve, kanë shkatërruar kapacitete kritike të Forcave të Armatosura ose pasuris kombëtare si dhe kanë dëmtuar rëndë imazhin e RSH në NATO.

Shënim: Pamvarësisht rreshtimit politik, me duhet të konfirmoj me përgjegjësi se përmbajtja, përfshi 12 pyetjet e këtij opinioni, janë tërësisht këndveshtrime profesionale, për shkak të funsioneve të larta që kam ushtruar brenda dhe jashtë vendit.

Gjeneral ® Piro AHMETAJ,
Këshilltar për Sigurinë Kombëtare në PD,
Ish-Zëvëndës Shef i Shtabit të Përgjithshëm të FA./ Opinion.al

Pas