Presidenti turk Rexhep Tajip Erdogan ka inauguruar ditën e djeshme një central bërthamor, në një lidhje online gjatë një aktiviteti të organizuar me këtë rast.
Kjo është shfaqja e parë publike e Erdogan pas një problemi shëndetësor, që pësoi gjatë një aktiviteti që po transmetohej drejpërdrejt në televizor.
Presidentit turk, i është dashur të anulojë befas daljen gjatë fushatës zgjedhore pasi u sëmur gjatë një interviste në televizion.
Kamerat u larguan papritur nga Erdogani tek një nga intervistuesit e tij, Hasan Öztürk, i cili dukej i shqetësuar dhe filloi të ngrihej nga karrigia e tij përpara se transmetimi të ndërpritet plotësisht. Në pamjet e shpërndara në media, Erdogan shpjegon se ai ishte tepër i lodhur pas punës intensive në fushatën javë para zgjedhjeve kryesore.
Po më vonë ka lajmëruar në Twitter duke shkruar se:
“Sot do të pushoj në shtëpi me këshillën e mjekëve të mi … me lejen e Zotit, ne do të vazhdojmë fushatën tonë nga nesër e tutje.”
Turqia po zhvillon zgjedhjet parlamentare dhe presidenciale më 14 maj, kur Erdogan përballet me një sfidë të përbashkët nga një opozitë gjashtëpartiake që përpiqet ta rrëzojë atë pas 20 vjetësh në pushtet. Shumë sondazhe i japin sfiduesit të tij kryesor, Kemal Kılıçdaroğlu, një epërsi të lehtë, mes pakënaqësisë me një krizë ekonomike të vazhdueshme dhe reagimin e qeverisë ndaj tërmeteve vdekjeprurëse që vranë më shumë se 50,000 njerëz në Turqi dhe 8,000 në Siri.
Erdogan, i cili do të kandidojë për një mandat të tretë si president, ka bërë një fushatë të fortë duke marrë pjesë në disa aktivitete në ditë, pasi përballet me një sfidë të vështirë në zgjedhjet e 14 majit. Sondazhet e fundit tregojnë për një epërsi të lehtë të sfiduesit kryesor të zotit Erdogan, udhëheqësi i opozitës së qendrës së majtë, Kemal Kilicdaroglu, i cili mbështetet nga Aleanca e Kombit, një grupim prej gjashtë partish politike.
Gjatë paraqitjes online, zoti Erdogan tha se ishte “krenar që ndërmerrte hapa për ta vendosur Turqinë mes vendeve të botës që disponojnë kapacitete bërthamore”.
Në ceremoni u shfaq po nëpërmjet lidhjes me video edhe Presidenti rus Vladimir Putin. Ai e cilësoi centralin “projektin më të madh në historinë e lidhjeve turko-ruse”.
Me aktivitetin e së enjtes, ‘Akkuyu’ u bë zyrtarisht centrali i parë i energjisë bërthamore në Turqi, edhe pse ndërtimi i tij po vazhdon. Pasi të përfundojë ai pritet të sigurojë rreth 10% të nevojave të Turqisë për energji elektrike.
Centrali, i cili po ndërtohet nga kompania shtetërore ruse e energjisë bërthamore ‘Rosatom’, ndodhet 338 kilometra në perëndim të epiqendrës së tërmetit shkatërrues që goditi Turqinë në muajin shkurt, duke shkaktuar vdekjen e 48,000 personave./Opinion.al
