Prezenca e Prokurorit të Përgjithshëm Olsian Çela ditën e sotme në qytetin e Fierit duket se është pritur me padurim nga disa qytetarë, të cilët e kanë ndaluar Çelën dhe kanë ndarë më të shqetësimet e tyre.
Ndër ta ishte edhe qytetarja Dallëndysha Meta.
Nëpërmjet një prononcimi për mediat Meta kërkoi drejtësi për djalin e saj Qani Metaj, i cili u përplas me makinë dhe u la në rrugë i vdekur, pasi autori siç tregon nëna e viktimës, u largua nga vendi i ngjarjes.
Sipas Dallëndyshe Metaj kanë kaluar 8 muaj dhe nuk ka marrë asnjë përgjigje nga organet e drejtësisë edhe pse autori u arrestua në të njëjtën ditë kur ndodhi aksidenti.
“Unë quhem Dallëndyshe Meta, nëna e Qani Metaj i cili para 8 muajsh u shtyp brutalisht me makinë dhe u la në rrugë i vdekur pa asnjë ndihmë nga autori, i cili u kap po atë ditë. Gjithmonë më është thënë nga Prokuroria dhe avokatët se janë në procedurë e sipër.
Ndërsa i jemi drejtuar Institutit të Lartë të Drejtësisë më është thënë se për 15 ditë do marr përgjigje, por ende sot nuk më është dhënë përgjigje.
Aksidenti ka ndodhur në rrugën Fier-Seman, në datën 17 shtator. Ne nuk kemi mbaruar ende procedurat edhe pse në këtë rast kemi një autor. Unë kërkoj që të mbyllet si procedura, zotëria që më ka bërë dëmin të marrë dënimin që meriton. Kërkoj vetëm drejtësi, asgjë tjetër. Kjo ngjarje po lihet pas dore sepse besoj që këtu ka korrupsion”, u shpreh ajo.
Ndërkohë nëna e viktimës i ka dalë para kryeprokurorit teksa ky i fundit po futej në ambientet e Prokurorisë së Fierit, dhe i ka treguar shqetësimin e saj./Opinion.al
