Gjykata e Selanikut ka vendosur sot masën e sigurisë “Arrest në burg” për 5 shqiptarët e arrestuar një javë më parë me 585 kg kokainë.
Para gjykatës, kanë dalë çifti i bashkëshortëve Arjan dhe Lutmira Xhafaj, 50 dhe 42 vjeç, Iliran Baraj dhe Klevis Muskaj 35 dhe 21 vjeç, të gjithë nga Fieri si dhe Avelino Feimi, 33 vjeç nga Vlora.
Pjesëtarët e bandës të cilët akuzohen për trafikim dhe shitje të lëndëve narkotike, thanë sot para trupës gjykuese greke se ishin thjesht “transportues” të ngarkesës dhe se sasinë e lëndës narkotike do t’ia dorëzonin dikujt tjetër dhe se thjesht po zbaronin urdhra, duke nënkuptuar se nuk kanë informacione të tjera në lidhje me destinacionin final të ngarkesës.
Sipas mediave greke, Arjan Xhafaj, i cilësuar si kreu i grupit, rezulton punonjës i zjarrfikëses në Shqipëri.
Ai ka thënë para gjykatës se do të paguhej 50 mijë euro për transportin e kokainës, ndërsa bashkëshortja e tij ka mohuar çdo pjesmarrje në ngjarje.
Kujtojmë se informacioni për ngarkesën e paligjshme ka mbërritur tek autoritetet greke përmes zyrës së Administratës Amerikane të Zbatimit të Drogës (DEA) në Athinë. Nuk dihet zyrtarisht se si dhe kur ka mbërritur droga, por dyshohet se ajo është transportuar me traget bregdetar për në portin e Selanikut.
Pjesa më e madhe e kokainës së konfiskuar synohej të eksportohej në shtetin fqinj, prej nga do të trafikohej drejt vendeve të tjera të Europës, siç njoftoi policia, ndërsa një pjesë e vogël do të trafikohej drejt Greqisë.
Disa nga 500 parcelat kishin mbi to simbole, që sipas zyrtarëve greke duket se lidhet me praktikën e ndjekur nga kartelet e Amerikës Latine të përdorimit të logove për të identifikuar sasitë e kokainës që prodhojnë në laboratorët e tyre./Opinion.al
