28-vjeçarja shqiptare që u arrestua në Kakavije nga policia greke për trafik të lëndëve narkotike, e kishte marrë drogën në territorin grek. Ajo quhet Izaura Musa nga qyteti i Fierit. Policia e Shtetit deklaron se Izaura Musa kaloi si këmbësore në Kakavije drejt Greqisë, mëngjesin e 6 Prillit. Bagazhet e saj u kontrolluan sipas procedurave nga Policia Shqiptare edhe nga Policia Greke.
Gjatë kontrollit nuk i është konstatuar asnjë send i kundraligjshëm. Dy ditë më vonë, më 8 Prill, 28-vjeçarja është ndaluar brenda territorit grek në autobuzin e linjës Kakavije-Janinë, duke transportuar 10 kilogramë kanabis çokollatë, duke udhëtuar nga Kakavija drejt Janinës.
Që prej datës 6 Prill kur dhe udhëtoi drejt Greqisë, Izaura Musa nuk ka hyrë në territorin shqiptar dhe lëndën narkotike e ka marrë në territorin grek. Gjithashtu, nga shkëmbimi i informacioneve të policisë shqiptare me homologët greke rezulton se kjo shtetase ishte në procedim nga Antidroga e Janines, prej kohësh, thuhet ne reagimin e policise shqiptare.
