Mbrëmjen e djeshme Shqipëria u trondit nga një atentat në autostradën Mamurras-Lezhë, në fshatin Gjormë i cili la pas 2 vitkima, Bujar Lika dhe Paulin Gjergji. Ky i fundit u transportuar i plagosur në spital, por nuk mundi t’u mbijetonte plagëve të marra.
Ndërkohë, në atentatin e ndodhur në orën 22:17 të së shtunës, në ambientet e jashtme të një hoteli mbeti i plagosur dhe 21-vjeçari Kreshnik Tusha.
Bëhet me dije se policia ka shoqëruar deri më tani 30 persona të dyshuar apo që mund të kenë dijeni për ngjarjen, ndërsa pritet dëshmia e të plagosurit Tusha, i cili u gjet pak metra larg vendngjarjes.
Forcat e policisë ndodhen aktualisht te spitali i Traumës, në pritje për të marrë dëshminë e tij. I riu i është nënshtruar mbrëmë një operacioni, pasi ka marrë tre plumba në këmbë.
Përveç gëzhojave, policia ka sekuestruar në vendin e ngjarjes një pistoletë në dorën e viktimës Lika, që dyshohet të jetë edhe shënjestër e atentatit.
Bujar Lika është një emër i njohur për policinë shqiptare dhe ishte me precedent penal të mëparshëm. Lika njihet edhe me mbiemrin Hasani dhe dyshohej si i përfshirë në një ngjarje kriminale në Linzë, ku mbeti i vdekur Enton Nikaj. Lika në vitin 2015 ishte mes të hetuarve për vrasjen e të riut, por në Apel ai u shpall i pafajshëm.
Ai po ashtu njihej si mik i ngushtë i një personi me precedent penalë, i njohur edhe si biznesmen në fushën e lojërave të fatit. Ndërsa Paulin Gjergji dhe Tusha rezultojnë persona pa precedente të mëparshëm penal./ Opinion.al
