Një grua ka rrëfyer sesi u dashurua me një gënjeshtar patologjik, i cili pretendonte se kishte ndalur një sulm terrorist dhe kishte ndërtuar spitale fëmijësh në Lindjen e Mesme. Abby Ellin, një shkrimtare 51 vjeçare nga New York-u, ishte shokuar kur zbuloi se historitë e karrierës magjepsëse të të dashurit ishin fantazi.
Abby Ellin tha për New York Post se ajo gati ishte martuar me ish të fejuarin. Ai i tregonte histori sesi kur punonte mjek marins, kishte kuruar Osama Bin Laden në një mision në Guantanamo Bay. Sipas tij, kjo kishte ndodhur një vit para se të kapej, dhe betohej se presidenti Barack Obama nuk dinte gjë.
Ai gjithashtu i thoshte se, si agjent i CIA-s shpesh konsultonte presidentin privatisht. Njëherë kishte shpëtuar edhe ish gruan e tij në Iran ku mbahej peng. Ai tregonte se kishte marrë edhe një çmim për ndaljen e sulmeve bioterroriste në New York.
“E dashuroja. Ishte i ndershëm, i mirë dhe magjepsës,” – tha Abby.
Ajo rrëfeu se e kish njohur të fejuarin e saj në vitin 2007, kur ai punonte si mjek në Beverly Hills, Kalifornia. Pas divorcit të tij, ata dolën bashkë dhe filluan të jetonin në një shtëpi në Washington DC. Puna e tij, që mendohej se ishte sekrete, e kishte bazën në Pentagon.
Si e zbuloi
Abby filloi të dyshonte për historitë e tij një ditë kur kishin dalë për dreke me prindërit e saj. Ajo tregon se shumë bindshëm ai po fliste sesa i shijoi ushqimi në restorant. Pas përfundimit të drekës, ai i tha privatisht se e urrejti ushqimin, dhe gjërat më përpara i tha për t’i bërë prindërit e saj të ndiheshin mirë.
Ajo filloi të shqetësohej se mos ai e kishte gënjyer edhe për gjëra të tjera. Kulmi arriti mbrëmjen e Vitit të Ri të 2011. Ai tha se terroristët po planifikonin të helmonin ujin e pijshëm që furnizonte New York-un.
Vetëm në vitin 2012 Abby e zbuloi se gjithçka ishte gënjeshtër. Një agjent special zbuloi se ai po nënshkruante receta false për Vicodin, Cialis, Viagra etj. Së bashku me emrat e kolegëve, hallës, ish vjehrrit dhe të dashurës së re, ai kishte përdorur edhe emrin e Abby-t./E.L.
