Burbuqe Vidhani është një 54-vjeçare nga Elbasani e cila ka vuajtur dënimin me 11 muaj burg pasi u akuzua si tutore që shfrytëzoi për prostitucion një grua në një lokal.
Në një intervistë për emisionin Uniko nga Spartak Koka në Klan Plus, Burbuqe Vidhani tregoi se punonte si banakiere në një lokal në Elbasan dhe kishte marrë si kamariere një grua në lokal, e cila disa ditë më vonë u arrestua në një hotel për prostitucion.
“Më arrestuan gjoja sikur unë kam shfrytëzuan punëtoren për prostitucion. Unë s’kam as provë, as fakte, as përgjime, asnjë gjë s’kam. E kam hedhur në Apel të Durrësit. Nga Apeli i Durrësit e kam çuar në Gjykatë të Lartë. E mora si punëtore se operova djalin”, thotë Burbuqe Vidhani.
Ndërsa bashkëshorti i saj tregon variantin e tij si nisi historia.
“Erdhi atë darkë në shtëpi dhe ma tha mua, ka ardhur një burrë, quhet Gani Berisha nga Fushë-Mbreti. Ai tha është i infiltruar i policisë. Po, i thashë, e di. E dinim ne, na thonin të tjerët se spiunat nuk mbarohen. Kjo më tha që Ganiu filloi me llafe të pista, unë e nxorra përjashta. Ai më tha shikoje çfarë kam për të të bërë, do më lëpihesh, do më ulesh në gjunjë. I thashë unë nuk ka për të të bërë asgjë, do të të çojë në burg”, rrëfen bashkëshorti i saj Enver Trebishta.
“Donte që të bënte dashnore mua, ai makinën e mbante me dashnore. S’më bëri dot, më çoi në burg”, tregon Burbuqe Vidhani.
“E zonja që u kap, thoshte nxirreni Burbuqen nga burgu se nuk ka lidhje me këtë çështje. Ata e mbajtën 11 muaj. U pyetën 12 dëshmitarë, të 12 dëshmitarët kishin folur që keni bërë gabim që e keni mbajtur atë grua në burg se ajo nuk është në atë rrugë”, shton Burbuqe Vidhani.
Ajo tregon se pas arrestimit e braktisën bashkëshorti Enver Trebishta dhe fëmijët e saj. 4 muaj pas qëndrimit në burg, i shkuan për herë të parë për vizitë fëmijët dhe burri.
“Fillimisht nuk e besova gruan. Nuk e besova se thashë kështu unë, shteti nuk të merr kot. Po duke parë gjyqet, duke dëgjuar çfarë thonin ata, kishte thirrur prokuroria 12 persona që kishin telefonata me këtë, ata që furnizonin dyqanin, ata që binin birrën, ata i kishin thënë keni bërë gabim që e keni marrë në burg, nuk është Buqja në atë rrugë. Asnjë nuk doli dëshmitar, vetëm ai që thamë i infiltruar i policisë, e mori për punë inati. S’ka dëshmitar të thotë që Burbuqja është e asaj rruge”, thotë bashkëshorti i Burbuqes. /tvklan.al
