Për disa orë forcat speciale RENEA mbajtën në tension zonën e “Komunës së Parisit” në Tiranë, ndërsa në pranga përfundoi Barush Bregut. 33-vjeçari, i konsideruar nga policia si një person me rrezikshmëri të lartë, fshihej prej disa javësh në një banesë në katin e fundit të një pallati tek Komuna e Parisit. Ai ndihmohej në arratinë e tij nga Bajram Çekorja, 21 vjeç, po nga Shkodra.
Sipas policisë Bregu është i dënuar me 4 vite burg për kultivim të bimëve narkotike, e kryer në bashkëpunim, në vitin 2016, si dhe me masë sigurie ‘Arrest në burg’, për armëmbajtje pa leje, pasi në shtator të vitit 2018, gjatë një operacioni të zhvilluar nga Policia, në banesën e këtij shtetasi u gjet një armë zjarri kallashnikov dhe municion luftarak.
Uniformat blu sqaruan se ai ishte i skeduar si pjesëtar i një grupi kriminal dhe është i dyshuar edhe si autor për ngjarje të tjera të rënda kriminale të ndodhura në qarkun Shkodër më parë, si dhe autor i dyshuar për “Trafikim të lëndëve narkotike”.
Sipas burimeve 33-vjeçari ishte pjesë e grupit “Lici”, rival me grupin e “Bajrave”, përplasja e të cilëve ka shkaktuar dhjetëra viktima në Shkodër. Thuhet se Bregu është përdorur për disa ngjarje kriminale por ende zyrtarisht nuk bëhet i ditur roli i tij./ Opinion.al
