Bashkimi Evropian theksoi angazhimin për të arritur një marrëveshje tregtare me SHBA-në bazuar në respekt dhe jo në kërcënime.
Deklarata erdhi pasi presidenti amerikan, Donald Trump, kërcënoi me vendosjen e një tarife prej 50% mbi të gjitha mallrat e dërguara nga BE-ja në SHBA. Komisioneri Evropian për Tregtinë, Maros Sefcovic, pas një telefonate me Përfaqësuesin Tregtar të SHBA-së, Jamieson Greer, dhe Sekretarin e Tregtisë, Howard Lutnick, deklaroi: “BE-ja është plotësisht e angazhuar për të siguruar një marrëveshje që funksionon për të dyja palët. Tregtia BE-SHBA është e pakrahasueshme dhe duhet të udhëhiqet nga respekti i ndërsjellë, jo nga kërcënimet. Ne jemi të gatshëm të mbrojmë interesat tona.”
Më herët të premten, Trump shprehu padurim për ritmin e negociatave tregtare BE-SHBA, duke thënë se ishte i vendosur në planin e tij për të rritur tarifat më 1 qershor.
Duke shkruar në rrjetet sociale, Trump tha: “Diskutimet tona me BE-në nuk po shkojnë asgjëkundi”, duke shtuar se nuk do të ketë tarifa për produktet e ndërtuara ose prodhuara në SHBA.
“Nuk po kërkoj një marrëveshje, ne e kemi vendosur marrëveshjen”, u tha ai gazetarëve më vonë, përpara se të shtonte menjëherë se një investim i madh në SHBA nga një kompani evropiane mund ta bënte atë të hapur për një shtyrje të këtij plani.
Siç shkruan BBC, BE-ja është një nga partnerët më të mëdhenj tregtarë të Washington-it. Vetëm vitin e shkuar, unioni dërgoi më shumë se 600 miliardë dollarë në mallra dhe bleu 370 miliardë dollarë.
Duke reaguar ndaj kërcënimeve të Trump për tarifa më të larta, liderët europianë paralajmëruan se një rritje e tillë do të ishte e dëmshme për të dyja palët.
“Nuk kemi nevojë të ndjekim këtë rrugë. Negociatat janë mënyra e vetme dhe e qëndrueshme për të ecur përpara”, tha kryeministri i Irlandës, Micheál Martin.
“Ne po mbajmë të njëjtën linjë: de-përshkallëzim, por jemi të gatshëm të përgjigjemi”, u shpreh ministri i Jashtëm francez, Laurent Saint-Martin.
Ministrja gjermane e Ekonomisë, Katherina Reiche, theksoi se BE-ja “duhet të bëjë gjithçka” për të arritur një zgjidhje me SHBA-në”.
Ndërsa, kryeministri i Holandës, Dick Schoof, mbështeti strategjinë e BE-së në negociatat tregtare, duke vënë në dukje: “Ne kemi parë më parë që tarifat mund të rriten dhe të ulen gjatë bisedimeve me SHBA-në“. Ky zhvillim vjen në një moment kritik për marrëdhëniet tregtare mes dy palëve, me ndikime të mundshme në ekonominë globale./tvklan.al
