Presidenti i SHBA, Donald Trump ka zhvilluar ditën e sotme një bisedë telefonike me kryeministrin e Izraelit, Benjamin Netanyahu.
Lajmi është konfirmuar nga zyra e kryeministrit izraelit.
Trump shprehu mbështetjen e tij për objektivat aktualë në lidhje me luftën në Gaza, si dhe për nevojën për të parandaluar që Irani të sigurojë armë bërthamore.
Po ashtu, thuhet se dy liderët ranë dakord për domosdoshmërinë që Irani të mos përvetësojë armë bërthamore.
Telefonata vjen pas sulmit me armë ndaj dy punonjësve të ambasadës izraelite në Uashington mbrëmjen e djeshme, dhe Trump shprehu “dhimbjen e tij të thellë për vrasjen e tmerrshme” të viktimave, sipas deklaratës së Netanyahut.
Netanyahu gjithashtu falënderoi homologun e tij amerikan për përpjekjet që ai dhe qeveria e tij po bëjnë për të luftuar manifestimet e antisemitizmit në Shtetet e Bashkuara, përfundon deklarata.
