Këshilli i Lartë Gjyqësor ka reaguar në lidhje me aktin kriminal të mbrëmjes së të enjtes ndaj anëtarëve të familjes së gjyqtares Gentiana Muçaj duke dënuar me forcë çdo akt që cenon sigurinë e gjyqtarëve.
Në një reagim zyrtar, KLGJ thotë se “akte të tilla të përbëjnë kërcënim serioz jo vetëm për gjyqtarët, por ndaj të gjithë sistemit të drejtësisë e idealeve themelore të një shoqërie të hapur dhe shtetit të së drejtës”.
Këshilli i Lartë Gjyqësor i shpreh mbështetjen e palëkundur familjes së prokurorit Arjan Muça dhe të gjithë anëtarëve të personelit të sistemit gjyqësor për të garantuar sigurinë e tyre, në mënyrë që të jetojnë e të ushtrojnë detyrën pa frikën e kërcënimeve nga armiqtë e drejtësisë.
“Këshilli i Lartë Gjyqësor është i gatshëm të bashkëpunojë ngushtë me agjencitë ligjzbatuese për zbulimin e autorëve të akteve të tilla kriminale, me qëllim ndëshkimin e tyre dhe parandalimin e ngjarjeve të tilla të rënda”, thuhet në reagim.
Më herët për ngjarjen reagoi edhe Këshilli i Lartë i Prokurorisë, që e cilësoi këtë ngjarje si një atentat terrorist ndaj sistemit të drejtësisë dhe vendosi t’i sigurojë familjes Muça një mbrojtje të posaçme.
