Emisioni “Stop” ishte në Tiranë, pasi ankesa e radhës vinte nga një zotëri i quajtur Demir Abazi. Ai tregoi, se ka qenë ish i dënuar politik për tradhti ndaj atdheut, pasi në vitin ‘67 është arratisur nga Dibra drejt Maqedonisë.
Është kapur dhe është dënuar me 10 vjet burg. 2 vite i ka bërë në Vlorë dhe më pas në Spaç, ku ka bërë punë të detyruar si minator.
Për shkak të kësaj pune, i janë zbritur ditët e dënimit dhe në total ka bërë 9 vite e 2 muaj, që vërtetohet edhe në arkivë.
“Katër muaj e gjysmë atëherë më kanë mbajtur në burg dhe pas 4 muaj e gjysmë më kanë kthyer në Shqipëri. U cilësova tradhtar i atdheut”, tha ai.
Meqenëse qeveria ka miratuar një ligj për shtesën e pensionit për të gjithë ata që kanë qenë minatorë, Abazi ka kërkuar këtë shtesë, por i është kërkuar nga sigurimet një vërtetim nga vendi, ku ka kryer dënimin dhe punën e detyruar, që ka bërë.
Në këto kushte ai i është drejtuar me shkresë Ministrisë së Brendshme, Ministrisë së Drejtësisë si dhe Drejtorisë së Përgjithshme të Burgjeve, por nuk ekzistojnë të dhënat.
“Përgjigja është, nuk disponojnë të dhëna për mua. Ku e kam bërë burgun unë? Paskam qenë në kamp pushimi unë. Me këtë përgjigje Sigurimet nuk më japin të drejtën për shtesën e pensionit të pleqërisë. Unë nuk paguaj 400 mijë lekë gjyq për një dokument që e kam shumë të qartë se kam qenë i dënuar politik në burgun e Spaçit. Kërkoj një zgjidhje se atë zgjidhje që nuk ma jep shteti do ma japë Stopi”, tha i moshuari.
Avokati Spartak Ngjela shpjegoi se e vetmja mënyrë e zgjidhjes është zhvillimi i një gjyqi pasi dokumentet dhe të dhënat janë shumë të vështira të gjenden. Është nxjerrë ligji për pagesën e dyfishtë, por punët me pagesë nuk shkruheshin. Ngjela tha se qeveria duhet t’ua njohë punën të gjithë ish të burgosurve politikë, pasi në këto burgje askush nuk ka ndenjur pa punuar.
“Jam në dijeni të rasteve të tilla. Është një mangësi e madhe e dokumentacionit, por që ka zgjidhje. Zgjidhja kryesore që mund të bëhet është që secili i interesuar, pasi provon që ka qenë në burgun e Spaçit, me dy dëshmitarë duhet të vërtetojë para gjykatës që ka qenë minator dhe vagonist, në qoftë se nuk gjen dot dëshmitarë për arsye të ndryshme. Duhet përmirësim për ligjin dhe të thotë që të gjithë personat e aftë për punë që kanë bërë burgun e Spaçit marrin automatikisht shtesën e pensionit. Ishin minatorët, nuk kishte vetëm zjarrvënës. Realizonin një punë prej 20 mijë lekësh në muaj, merrnin 1500 lekë. Me dokumentet që janë ata kanë zhdukur dokumentet me anë të të cilave je paguar për punën tënde”, tha Ngjela. /Tv Klan
