Policia e Elbasanit ka vënë në pranga një 20-vjeçar, pasi u kap në flagrancë duke transportuar 5 shtetas të huaj nga vendet e treta.
Me vendosjen e trupave të FRONTEX në Shqipëri, për monitorimin e kufijëve për parandalimin e hyrjes së paligjshme të emigrantëve nga Afrika dhe Lindja e Mesme, është rritur edhe numri i ndalimit të këtyre shtetasve.
Specialistët për Hetimin e Trafiqeve të Paligjshme në Policinë e Elbasanit, pas informacioneve të marra në rrugë operative se një shtetas transportonte nga Korça, disa shtetas nga vendet e treta, me qëllim dhënien ndihmë për kalim të paligjshëm të kufirit, kundrejt fitimit, zhvilluan aksionin për kapjen e tij.
Në pranga ra një 20 vjeçar me iniciale R. H, banues në Durrës.
Arrestim i tij u bë në fshatin Bradashesh, Elbasan. Ai u kap duke transportuar me mjetin furgon tip “Fiat”, 5 shtetas të huaj.
Në momentin e ndërhyrjes së Policisë ky shtetas nuk i është bindur urdhrit të punonjësit të Policisë për të ndaluar dhe nga verifikimet e bëra rezultoni se drejtonte mjetin pa leje drejtimi.
Materialet hetimore i kaluan Prokurorisë pranë Gjykatës së Shkallës Parë Elbasan, për veprat penale “Ndihma për kalim të paligjshëm të kufirit”, “Drejtimi i mjetit në mënyrë të parregullt” dhe “Mosbindja ndaj urdhrit të punonjësit të policisë së rendit publik “./ Opinion.al
