Nga “dhimbja e kokës” për të për balluar mungesat e shumta në Kombëtare me të cilat do të përballet kundër Italisë dhe Spanjës, te një gjyq për çështje mashtrimi. Kristian Panuçi duket se po kalon një periudhë shumë impenjative.
Trajneri i Kombëtares shqiptare të futbollit është përfshirë në një seancë gjyqësore, të cilën e ka iniciuar ai vetë. Trajneri italian ka paditur personat, të cilëve u ka shitur më parë ish-makinën e tij Ferrari 599.
GJYQI – Dje, në gjykatën e Savonës, trajneri aktual i kuqezinjve ka dëshmuar kundër personave që i ka paditur për mashtrim. Kristian Panuçi është përballur në seancën gjyqësore kundër blerësit Mateo Leporati dhe përfaqësueses ligjore të një kompanie koncesionare makinash, Eleonora Atzori.
Tekniku aktual i kuqezinjve nuk ka marrë të gjitha pagesat për makinën që ka shitur dhe ka zgjedhur rrugën ligjore për të marrë atë që i takon në bazë të kontratës së bërë me blerësit e makinës. Ish-futbollisti i Kombëtares italiane të futbollit është paraqitur përballë togave të zeza për të dhënë versionin e tij mbi ngjarjen ku ka akuzuar blerësit e makinës për mashtrim.
MASHTRIMI – Përfaqësuesja ligjore e koncesionarit të makinave, Atzori, kishte marrë përsipër që ta transferonte “kokëkuqen” në Gjermani, mirëpo diçka e tillë është bërë pa përfunduar të gjitha procedurat e blerjes nga Panuçi.
Largimi i makinës drejt Gjermanisë është bërë pa u përfunduar të gjitha pagesat e nevojshme kundrejt Panuçit për blerjen përfundimtare të mjetit. Mediat italiane kanë raportuar mbi seancën e djeshme gjyqësore, ku trajneri i Kombëtares shqiptare ka dalë para trupës gjykuese për të dëshmuar mbi faktet që ai disponon kundër palës tjetër, të cilën e ka akuzuar për mashtrim./Panorama Sport
