Personalitete të politikës shqiptare kanë reaguar lidhur me aksidentin tragjik të ndodhur këtë të martë në Bullgari.
Presidenti Ilir Meta në një reagim në rrjetet sociale shkruan se në këto çaste të rënda iu shpreh ngushëllimet familjarëve dhe autoriteteve të vendit fqinj.
“Hidhërim i madh dhe trishtim i thellë për humbjen aksidentale tragjike të jetës të bashkëkombësve tanë nga Maqedonia e Veriut. Në këto çaste të rënda i shpreh ngushëllimet më të thella familjarëve dhe autoriteteve të vendit fqinj, si dhe uroj shërim sa më të shpejtë dhe të plotë për të mbijetuarit!”, shprehet Meta në reagimin e tij.
Edhe kreu i PD-së, Lulzim Basha, shkruan se është shokuar nga tragjedia e tmerrshme e ndodhur në Bullgari.
“I shokuar nga tragjedia e tmerrshme në Bullgari që shkaktoi humbjen e kaq shumë jetëve të pasagjerëve, përfshirë shumë bashkombas tanë e mes tyre shumë të mitur. Ngushëllimet më të ndjera familjeve të viktimave. Zoti ju dhënë forcë në përballimin e kësaj dhimbje të tmerrshme”, thotë Basha.
Të paktën 45 turistë nga Maqedonia e Veriut humbën tragjikisht jetën pasi autobusi me të cilin ktheheshin nga Turqia, u aksidentua në një autostradë në Sofje të Bullgarisë dhe shpërtheu në flakë./Opinion.al
