Në një intervistë për emisionin Versus të gazetarit Artur Nura, në A1 Report, ish-presidenti Bamir Topi është ndalur edhe te koalicionet e muundshme zgjedhore, si edhe te përvoja e marrëveshjes me kreun e qeverisë, Rama.
I pyetur drejtpërdrejt për këtë, ai ka patur një përgjigje interesante.
Nura: Ju keni patur një marrëveshje me z.Rama për këtë. I ka qëndruar z.Rama marrëveshjes së shkruar, që ju e keni përmendur në vazhdimësi si marrëveshje parimore?
Topi– Në Shqipëri nuk ka shumë burrni. Dhe mungesa e burrnisë vlen për të gjithë partnerët politik. Marrëveshja ka qenë shumë e hapur. Unë e kam interpretuar. Kemi dhënë arsyet pse jemi detyruar që të futemi në një koalicion. Çështja është e një interpretimi relativ të palëve. Sido që të vijë situata, partia që unë drejtoj është një parti e qendrës së djathtë.
Por brenda profilit politik, ka shumë gjera që shumë parti në Shqipëri dallohen për nga programi. Ne kemi qenë një parti që në raportin shtet pushtet i kemi dhënë shumë rëndësi çështjes së shtetit.Di shumë mirë se çfarë dëmesh i ka bërë pushteti, shtetit në Shqipëri. Në rast se ne kemi probleme me institucionet, nuk ka harmoni në institucione. Këto probleme i kemi nga pushteti. Fakte ka sa të duash. Ne po vuajmë mbas 9 vitesh 21 prillin e 2008. Unë i kam paralajmëruar në atë kohë.
Problemi është që kjo është një republikë jo institucionale. Unë kam parë një regres të dukshëm në profilin e institucioneve. Sot në Shqipëri janë dy palë që luajnë, dhe që nuk kanë arbitër. Në kushtetutën tonë arbitri jonë është presidenti i Republikës.
