Deputetja demokrate, Jozefina Topalli kërkoi sot mocion votëbesimi për Qeverinë. Sipas saj, mazhoranca ka rënë, pasi prej 3 javësh mungojnë në seancat plenare ministrat e LSI. Sot mungon edhe kryetari Ilir Meta i cili ndodhet në Vjenë. Po kështu sot mungon në parlament edhe Kryeministri Edi Rama.
“1 muaj që Kryeministri nuk vjen në parlament. 3 javë që ministrat e LSI kanë lënë karriget bosh. Çfarë po ndodh? Çfarë mazhorance jeni ju? Kërkoj mocion votëbesimi për Kryeministrin”, tha Topalli.
Pas saj e ka marrë fjalën Berisha i cili tha “Ai nuk është Kryeministër ai është një pullë e kuqe. Një burracak që nuk përballet…kërkoj të mos vijë më në këtë parlament. Të marrim një vendim ta nxjerrim jashtë. Ta largojmë më mirë se sa ata (qytetarët) të shtunën tek sheshi.
Në përgjigje Valentina Leskaj shprehet se: Ramën e kanë votuar qytetarët dhe do ta votojnë edhe më 18 Qershor…
Më pas e ka marrë fjalën Braçe, i cili dha lajmin se Rama ndodhet në Kosovë për festimet e 9 Vjetorit të Pavarësisë. Në fakt festimet për Pavarësinë janë nesër më 17 Shkurt dhe nuk dihet ende axhenda e sotme e Ramës në Kosovë. /Opinion.al
