Një ndërhyrje e veçantë dhe e vështirë është kryer pranë Qendrës Spitalore Universitare “Nënë Tereza” në spitalin e neuro-kirurgjisë.
Një paciente nga Shkodra, e re në moshë është arritur të shpëtohet pas një operacioni prej 4 orësh, të kryer për shkak të një aneurizmi të arteries së trurit.
Lajmi është bërë i ditur nga Ministrja e Shëndetësisë, Ogerta Manastirliu, përmes një publikimi në rrjetet sociale.
“Kur shpresa për jetën varej në një fije të hollë, një ndërhyrje e shkallës tepër të lartë të vështirësisë në shërbimin e neurokirurgjisë në QSUT, i ka shpëtuar jetën një vajze të re nga Shkodra. Pas ekzaminimeve në spitalin rajonal të Shkodrës dhe në QSUT, mjekët zbuluan sëmundjen e rrallë e të rëndë, aneurizëm i arteries së trurit dhe kryen operacionin delikat prej më shumë se 4 orësh, i cili përfundoi me sukses, falë ekipit të talentuar të neurokirurgjisë, me dr. Artur Xhumarin, dr. Gramoz Braçe, dr. Kliti Pilika. Me punën e palodhur në ekip të mjekëve dhe infermierëve të sallës operatore, reanimacionit dhe shërbimit të neurokirurgjisë, e reja nga Shkodra është gati të kthehet në shtëpi”./Opinion.al
