Bashkë me temperaturat e larta vjen çdo verë edhe problemi i furnizimit me ujë në kryeqytet. Kësaj radhe nuk është vetëm mungesa e ujit në çezma, pasi tashmë qytetarët janë mësuar se ai është me orar, por është problemi i ujit të pijshëm. Siç dihet uji i çezmës përdoret vetëm për larje, ndërsa për të pirë një pjesë e mire e qytetarëve mbushin uji Dajti.
Në këtë rast problemi është pikërisht tek uji i Dajtit dhe i Selitës: Janë bllokuar prej datës 28 Maj të gjitha automjetet që mbusheshin në Dajt dhe shpërndanin ujë me bote në të gjitha lagjet e Tiranës. Kjo me urdhër të Ujësjellës Kanalizimeve Tiranë (UKT), institucion në varësi të Bashkisë Tiranë.
Pas disa shqetësimeve që mbërritën në redaksinë tonë, nga banorë të revoltuar që dilnin çdo ditë për të mbushur uji të pijshëm, por furgoni nuk dukej gjëkundi, Opinion.al u interesua pranë UKT.
Zëdhënësja pranoi se aksioni ka nisur nga UKT-ja. Përmes një shkrese drejtuar disa institucioneve si Policia e Shtetit, Policia Bashkiake, Agjencia e Baseneve, ISHP-ja, etj, UKT ka kërkuar suport për të bllokuar automjetet që sipas saj tregtojnë ujë në mënyrë të paligjshme. Po sipas UKT aksioni ka nisur pasi është konstatuar se janë bërë disa shpime të paligjshme në tubin kryesor në Lanabregas.
Pra sipas zëdhënëses, disa subjekte kanë dëmtuar tubin për të marrë ujin e burimit dhe për ta tregtuar atë në qytet. Po sipas UKT, ky aksion bazohet në reformën e ujit lançuar më herët nga qeveria.
Opinion.al konktaktoi edhe me Policinë e Shtetit e cila tha se nuk po merr pjesë në aksionin e UKT-së pasi nuk është në tagrin e saj ligjor. Sipas saj, bllokimi i autoboteve të ujit mund të jetë bërë me asistencen e Policisë Bashkiake.
Thënë më thjesht, Bashkia e Tiranës nuk i lejon më qytetarët të mbushin ujë të pijshëm të autobote përkundrejt një tarife të ulët prej 30 lek/bidoni por i detyron ata tu drejtohen dyqaneve e marketeve për të blerë ujë të ambalazhuar me çmim disa here më të shtrenjë.
Kjo ka ngjallur revoltë. Qytetarët thotë se është kosto shtesë dhe rëndon pikërisht shtresat e mesme e të varfëra që nuk kanë mundësi të blejnë ujë të ambalazhuar. Madje akuzojnë bashkinë se ka ndërmarrë këtë aksion për të favorizuar kompanitë e mëdha që tregtojnë ujë të pijshëm të ambalazhuar. Ata apelojnë që të zgjidhet kjo çështje pasi UKT jo vetëm që nuk u siguron ujë të pastër për konsum nga çezma por tashmë i ndalon ta blejnë atë me një çmim të favorshëm tek autobotet.
/Riviera Dedaj-Opinion.al
