Trajneri i Kosovës, Franco Foda pas ndërprerjes së ndeshjes me Rumaninë, pas thirrjeve anti shqiptare tha se në fund të sfidës humbi respekti.
Gjatë konferencës për media, Foda tha se shpreson që në të ardhmen UEFA të ndërmarrë hapa të duhur që ajo që ndodhi mbrëmjen e djeshme të mos përsëritet.
“Në konferencën e djeshme kërkuam që çdokush të shfaqte respekt brenda dhe jashtë fushës. Para ndeshjes u kam thënë futbollistëve që të tregojnë se si Kosova mund të luajë futboll dhe këtë e kemi treguar në mënyrë të shkëlqyer.
Fatkeqësisht në fund të ndeshjes humbi respekti. Dhe për këtë arsye fillimisht vendosëm që të largohemi nga fusha. Më pas kemi biseduar me futbollistët dhe gjithë të tjerët për t’u kthyer në fushë.
Më vjen keq për këtë, pasi ekipi bëri lojë të shkëlqyer sonte. Por çdo kush duhet ta respektojë faktin se ne jemi Kosova. Shpresoj që në të ardhmen UEFA të ndërmarrë hapa të duhur që ajo që ndodhi sonte mos të ndodhë prapë”, deklaroi Foda.
