Themeluesi i platformës “Telegram”, Pavel Durov, është në përgatitje të testamentit të tij lidhur me pasurinë, që për atë që do pasojë mund të themi se do tingëllojë pak çuditshëm.
Pasuria e tij, e vlerësuar prej 13.9 miliardë dollarë, do të ndahet në përpjestim të drejtë mes mbi 100 fëmijëve të tij.
Durov ka 6 fëmijë nga tre partnere të ndryshme, por kush janë këta 100 fëmijë të tjerë? Ai ka dhuruar spermën e tij në klinika të posaçme. Për shkak të dhurimeve të bëra prej tij në klinikë, janë ngjizur më shumë se 100 fëmijë, në 12 vende të ndryshme, siç shprehet Durov.
“Ata janë të gjithë fëmijët e mi, e do të kenë të gjithë të njëjta të drejta! Nuk dua që ata të shqyejnë njëri-tjetrin pas vdekjes sime”, u shpreh Durov, raporton BBC.
Por, marrja e pjesës së pasurisë nuk do të jetë e menjëhershme, pasi duhet plotësuar një kusht. Sipas Durov, fëmijët e tij nuk do të kishin qasje në trashëgiminë e tyre për 30 vjet.
“Dëshiroj që ata të jetojnë si njerëz normalë, të ndërtojnë veten vetëm, të mësojnë t’i besojnë vetes, të jenë në gjendje të krijojnë, të mos jenë të varur nga një llogari bankare”, tha ai.
40-vjeçari tha se kishte shkruar një testament tani sepse puna e tij “përfshin rreziqe të shumta, pasi mbrojtja e lirive të sjell shumë armiq, përfshirë brenda shteteve të fuqishme”, siç shprehet ai.
Aplikacioni i tij, Telegram, i njohur për fokusin e tij në privatësi dhe mesazhe të koduara, ka më shumë se një miliard përdorues aktivë mujorë.
Hetimet ndaj Pavel Durov
Që prej vitit të kaluar, Pavel Durov, është vënë zyrtarisht nën hetim në Francë, por ndodhet në gjendje të lirë e jo i arrestuar pasi gjodhi lirinë me kusht në këmbim të një depozimit të një garancie financiare prej 5 milionë eurosh. 40-vjeçari nuk duhet të dalë jashtë territorit të Francës deri në përfundim të hetimeve dhe është i detyruar të paraqitet në polici, dy herë në javë.
Prokurorët në Paris thonë se kanë mbledhur prova të mjaftueshme për ta akuzuar atë se ka u ka vënë në dispozicion bandave kriminale platformën e tij online për transaksione financiare, ka lejuar grupet e krimit të organizuar për të shkëmbyer materiale me përmbajtje seksuale me të mitur dhe se ka refuzuar të komunikojë me autoritetet.
“Vetëm pse kriminelët përdorin shërbimin tonë të mesazheve midis shumë të tjerëve, nuk i bën ata që e drejtojnë atë kriminelë”, tha ai.
Teksa rrjetet më të mëdha sociale të botës janë angazhuar të zbatojnë rregullat kombëtare dhe ndërkombëtare për të mbrojtur fëmijët nga materialet me përmbajtje për të rritur, Telegram akuzohet se nuk i ka përmbushur këto standarde.
Ai ka mohuar se ka dështuar të bashkëpunojë me zbatimin e ligjit në lidhje me trafikimin e drogës, përmbajtjen e abuzimit seksual me fëmijë dhe mashtrimin. Telegram më parë ka mohuar se ka pasur moderim të pamjaftueshëm.
Nën pretekstin e mbrojtjes së fjalës së lirë, Durov i cili ka edhe nënshtetësi franceze prej 2021-shit nuk ka pranuar as zbatojë filtrat kundër lajmeve të rreme, duke i lënë akses të lirë propagandës kryesisht nga Rusia të depërtojë në perëndim, ndonëse është vetëshpallur opozitar me Vladimir Putinin.
Durov themeloi Telegram në vitin 2013 dhe aplikacioni mbetet popullor në Rusi.
Telegram lejon grupe deri në 200,000 anëtarë, gjë që kritikët kanë argumentuar se e bën më të lehtë përhapjen e dezinformatave dhe që përdoruesit të ndajnë përmbajtje konspiraciste, neonaziste, pedofile ose të lidhura me terrorizmin.
Në Mbretërinë e Bashkuar, aplikacioni u shqyrtua për transmetimin e kanaleve të ekstremit të djathtë që luajtën një rol të rëndësishëm në organizimin e trazirave të dhunshme në qytetet angleze verën e kaluar.
Telegram hoqi disa grupe, por në përgjithësi sistemi i tij i moderimit të përmbajtjes ekstremiste dhe të paligjshme është dukshëm më i dobët se ai i kompanive të tjera të mediave sociale dhe aplikacioneve të mesazheve, sipas ekspertëve të sigurisë kibernetike.
