TIRANË- Ministri i Enegjisë dhe Industrisë, Damian Gjiknuri thotë se Qeveria ka marrë masat që të ndjekë në Gjykatën e Arbitrazhit ankesën e bërë nga Bankers Petroleum për ngrirjen e llogarive të kompanisë së naftës.
Ndryshe nga rasti me CEZ ku Qeveria u tërhoq nga arbitrazhi, Gjiknuri tha se qeveria është e vendosur t’i shkuar deri në fund.
“Problemet me Bankers kanë kohë që kanë filluar dhe kanë të bëjnë me auditet e kryera që rezultojne se kostot që ka paraqitur kompania janë të fryra. Ne kemi marrë masat që të mbrojme në arbitrazh interesat e Qeverisë shqiptare”, u shpreh ai.
Por në reagimin e saj të fundit Bankers Petrolium thotë se “Gjykata Ndërkombëtare e Arbitrazhit me vendimin e datës 21 nëntor e detyron Drejtorinë e Tatimeve të heqë pezullimin e llogarive bankare ndaj saj, por Qeveria ende nuk e zbatuar këtë vendim.
Përplasja e Bankers me Qeverinë shqiptare nisi pas urdhrit te Drejtorisë së Tatimeve për të bllokuar llogaritë bankare të kompanisë në Shqiperi me qëllim marrjen e 75 milionë dollarëve detyrime, te cilat Tatimet pretendojnë se duhet të paguhen nga kompania.
