Mijëra njerëz nga e gjithë Serbia i janë bashkuar një proteste kundër korrupsionit në Beograd, në atë që konsiderohet si kulmi i protestave disamujore që kanë tronditur kontrollin e presidentit të vendit, Aleksandër Vuçiç.
Zhurmat e bilbilave bënë jehonë në të gjithë kryeqytetin serb, i cili është në gatishmëri të lartë që nga shpallja e tubimit.
Tubimi antiqeveritar ka të ngjarë të jetë më i madhi i mbajtur ndonjëherë në vendin ballkanik, shkruan “The Guardian”.
Policia tha se kishte arrestuar një burrë që përplasi makinën e tij me protestuesit në një periferi të Beogradit, duke plagosur tre persona.
Tensionet po rriteshin përpara demonstratës, pasi mbështetësit e presidentit filluan të ngrenë një kamp në një park përpara pallatit presidencial.
Vuçiç paralajmëroi në fillim të kësaj jave se efektivët e sigurisë do të përdorin forcën kundër njerëzve në tubim.
Transporti i qytetit të Beogradit u anulua të shtunën në një përpjekje të dukshme për të parandaluar njerëzit të merrnin pjesë në miting, ndërsa kolona të mëdha makinash bllokuan rrugët që të çojnë në kryeqytet.
Vuçiç, i cili ka dominuar politikën serbe që kur u bë kryeministër në 2014 dhe më pas president në 2017, tha se demonstruesit nuk do ta detyronin kurrë të tërhiqej.
“Do të duhet të më vrasësh nëse dëshiron të më zëvendësosh,” tha ai.
Autoritetet janë përballur me protesta thuajse të përditshme që nga nëntori i kaluar, kur një çati e stacionit u shemb duke vrarë 14 njerëz në Novi Sad, qyteti i dytë i Serbisë.
Lëvizja protestuese pa liderë ka qenë kryesisht paqësore, por Vuçiç ka pohuar se protestuesit “do të përpiqen të arrijnë diçka me dhunë dhe ky do të jetë fundi” dhe parashikoi se “shumë do të përfundojnë prapa hekurave” të shtunën./Opinion.al
