Shqipëria është një rrëmujë e madhe. Ky është titulli që i ka kushtuar media prestigjioze britanike “The Economist” Shqipërisë, një ditë para zgjedhjeve vendore.
Sipas tyre Shqipëria është në kaos dhe në qendër të këtij kaosi është kriza politike që ka mbërthyer vendin që prej shkurtit të 2019. Nga një anë është Basha që po përpiqet të dëshmojë se kryeministri Rama u ndihmua nga krimi i organizuar për të fituar zgjedhjet e fundit të përgjithshme, në vitin 2017. “Rama e mohon atë dhe thotë se do të padisë gazetarin Peter Tiede, i cili publikoi përgjimet në gazetën gjermane Bild. Ndërkohë më 17 qershor, Basha ishte thirrur për t’iu përgjigjur akuzave për financimin e paligjshëm të partisë së tij, akuza për të cilat kreu i PD-së thotë se akuzat janë të rreme”, shkruan The Economist.
E gjithë kjo klimë që zhvillohet prej muajsh do ta ketë kulmin e saj më 30 qershor. Data e shumë diskutuar e zgjedhjeve vendore për të cilën nuk kanë ndërhyrë vetëm aktorët vendas por edhe ata të huaj.
“Më 30 qershor do të mbahen zgjedhjet për kryetarët e bashkive. Zoti Rama thotë se do të shkojë përpara, edhe pse Presidenti Ilir Meta i ka shtyrë për shkak të situatës së rënduar. Kolegji zgjedhor mbështet qeverinë, por zoti Basha thotë se zgjedhjet janë të paligjshme dhe ka bërë thirrje për bojkotimin e tyre. Basha po kërkon miratimin ndërkombëtar për protestat e tij dhe bojkotin e parlamentit, por deri më tani nuk e ka marrë. Sulmet e mbështetësve demokratë në bashkitë e mbajtura nga partia e tij kanë sjellë reagime të ashpra nga qeveritë e huaja. Nëse zgjedhjet vazhdojnë, partia e zotit Basha do të humbasë vendet e punës dhe patronazhin që qeveria lokale i jep. Në të njëjtën kohë, parlamenti, në të cilin Partia Socialiste e zotit Rama ka shumicën, ka filluar lëvizjet për të shkarkuar Presidentin Meta”, shkruan gazeta britanike.
Në optikën e The Economist lufta është për pushtet, jo më kotë ata e cilësojnë politikën në Shqipëri “një biznes i pistë”. Kjo mjafton sipas atyre që ngjarjet të bëhen të paparashikueshme, madje deri aty sa mund ti përafrohen atyre të vitit 1997.
“Në vitin 1997, Shqipëri u trondit nga një rënie e plotë e rendit dhe ligjit kur qytetarët rrëmbyen tanket dhe e detyruan presidentin e atëhershëm Sali Berisha të jepte dorëheqjen. Edhe pse demokracia drejt të cilës ka ecur Shqipëria e bën shumë të vështirë që një ngjarje e tillë të ndodhë përsëri, politika në Shqipëri është një biznes i pistë. Partitë kryesore janë të lidhura me klanet të paqëndrueshme. Basha thotë se armiqtë e krerëve të krimit të organizuar, të cilët janë aleatë të socialistëve, i kanë bërë atij propozime nga më tronditëset, për të cilat kreu i PD-së shprehet se i ka hedhur poshtë”, shkruan The Economist.
Megjithatë në artikull vlerësohet reforma në drejtësi dhe kjo për ta përbën një dritë në fund të tunelit nga ku mund të fillojë zgjidhja e gjithë kësaj rrëmuje të madhe.
“Megjithatë situata kaotike duket se po pastrohet pak të paktën në gjykatat e Shqipërisë. Gjyqtarët dhe prokurorët po shqyrtohen për pasuri të pashpjegueshme apo lidhje me krimin e organizuar”, përfundon “The Economist”. /Opinion.al
