Aktualitet

Terrorizmi, DASH publikon raportin për Shqipërinë, çfarë thuhet në të


Bëhu pjesë e Grupit Zyrtar të Opinion.al
>> KËTU <<
               Publikuar në : 16:21 - 17/12/21 |
Opi Nion

Departamenti Amerikan i Shtetit ka publikuar raportin mbi terrorizmin gjatë vitit 2020, për secilin shtet në botë, ku thuhet se në gjatë vitit 2020, Shtetet e Bashkuara dhe partnerët e tyre shënuan përparime të mëdha e të rëndësishme kundër organizatave terroriste.

Në raport përmendet edhe Shqipëria, për të cilën thuhet se vendi vazhdoi mbështetjen e fuqishme të përpjekjeve ndërkombëtare kundër terrorizmit në vitin 2020 dhe kontribuoi në Koalicionin Global për të mposhtur ISIS-in.

Po ashtu në raport theksohet se nuk ka pasur asnjë incident terrorist të raportuar në Shqipëri në vitin 2020.

Ndër të tjera në përmbledhjen për vendin tonë thuhet se:

“Shqipëria vazhdoi mbështetjen e saj të fortë në përpjekjet ndërkombëtare kundër terrorizmit në vitin 2020 dhe kontribuoi në Koalicionin Global për të luftuar ISIS-in.

Kërcënimi nga terrorizmi në Shqipëri përfshin luftëtarët e huaj që kthehen nga Iraku dhe Siria dhe përpjekjet e simpatizantëve të ISIS-it për të radikalizuar të rinjtë shqiptarë, si dhe aktivitetin e sponsorizuar nga shteti i Iranit drejtuar kryesisht kundër grupit iranian Mujahedeen-e-Khalq, anëtarët e të cilit janë strehuar në Shqipëri.

Raporti gjithashtu vë theksin tek legjislacioni, zbatimi i ligjeve dhe siguria kufitare, ku thekson se:

“Shqipëria kriminalizon aktet terroriste, duke përfshirë ‘financimin e terrorizmit, kryerjen e transaksioneve të personave në listat e sanksioneve të OKB-së, rekrutimin dhe trajnimin e njerëzve për të kryer akte terroriste, nxitjen e akteve terroriste dhe vendosjen, drejtimin dhe pjesëmarrja në organizata terroriste ose konflikte të armatosura jashtë vendit’.

Shqipëria mbështet një sistem mbikëqyrjeje të sigurisë portuale për të përmbushur kërkesat sipas Kodit Ndërkombëtar të Sigurisë së Anijeve dhe Objekteve Portuale të Organizatës Ndërkombëtare Detare.

“Shqipëria është angazhuar të rrisë sigurinë e saj kufitare dhe përpjekjet për kontrollin për të ndaluar udhëtimin e terroristëve, në përputhje me standardet ndërkombëtare dhe me mbështetjen e ekspertëve dhe programeve të SHBA-së”, vijohet më tej.

Ndër të tjera në raport thuhet se në vitin 2020, Shqipëria filloi zbatimin e një regjimi më të rreptë të burgjeve për të dënuarit e rrezikshëm, përfshirë edhe për një të dënuar për rekrutim me qëllim terrorizmi, thuhet më tej në raport.

DASH vëren se Qendra Kombëtare e qeverisë shqiptare kundër terrorizmit të dhunshëm, mbetet aktive në mbështetet nga një gamë e gjerë programesh ndihme dhe angazhimi diplomatik nga Departamenti amerikan i Shtetit, duke përfshirë grupet e komunitetit lokal që identifikojnë dhe zbusin faktorët që mbështesin ekstremizmin e dhunshëm. Ambasada në Tiranë mbikëqyrë zbatimin e një granti, të katërtin me radhë për Komunitetin Mysliman të Shqipërisë, i cili përfshinë angazhimin e klerit islam me të rinjtë dhe prindërit e tyre për t’i larguar ata nga rrugët drejt radikalizmit e dhunës dhe informimin e të rinjve për parimet demokratike, të drejtat e njeriut, detyrat qytetare dhe tolerancën. Viti 2020 ishte viti i fundit i programit në këtë fushë të Agjencisë Amerikane për Zhvillim Ndërkombëtar në Shqipëri.

 

 

 

Pas