Një 20-vjeçar i shpallur në kërkim është arrestuar nga policia e Sarandës, pasi dy vite më parë tentoi të vrasë me thikë një shtetas, pas një konflikti.
Uniformat blu bëjnë me dije se ky shtetas dyshohet se pas një konflikti për motive të dobëta, ka tentuar të vrasë me thikë një shtetas tjetër, të cilit i ka shkaktuar dëmtime të rënda.
Sipas informacioneve zyrtare, së bashku me shtetasin 20 vjeçar janë arrestuar edhe shtetasit 26 vjeçar dhe 19 vjeçar, pasi dyshohet se kanë përkrahur të riun që të fshihej.
“Specialistët e Seksionit për Hetimin e Krimeve të Komisariatit të Policisë Sarandë, në bashkëpunim me shërbimet e Forcës së Posaçme “Shqiponja”, bazuar në informacionet e siguruara nga inteligjenca informative, për vendndodhjen e një shtetasi të shpallur në kërkim për një rast të krimeve kundër personit, kanë organizuar dhe finalizuar operacionin policor të koduar “Expose”, si rezultat i të cilit u lokalizua dhe u kap shtetasi 20 vjeçar, banues në Sarandë.
20-vjeçari ishte shpallur në kërkim, pasi Gjykata e Shkallës së Parë Sarandë i ka caktuar masën e sigurisë “Arrest në burg”, për veprën penale “Vrasja”, mbetur në tentativë. Më datë 10.01.2020, në lagjen nr.4, Sarandë, ky shtetas dyshohet se pas një konflikti për motive të dobëta, ka tentuar të vrasë me mjet prerës (thikë nje shtetas tjetër, të cilit i ka shkaktuar dëmtime të rënda.
Në kuadër të këtij operacioni, së bashku me shtetasin 20 vjeçar janë arrestuar edhe shtetasit 26 vjeçar dhe 19 vjeçar, pasi dyshohet se kanë përkrahur 20-vjeçarin që të fshihej”, tha policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme./Opinion.al
