Mjeku u cili tentoi të fshehë plagosjen e 26-vjeçarit në Elbasan dy ditë më parë, është pezulluar nga detyra.
Përmes një njoftimi zyrtar mësohet se mjekun K.D., nuk e njoftoi policinë kur 36-vjeçari i lënduar u paraqit në spital.
Kjo erdhi si pasojë e një konflikti fizik dhe me armë të ftohta, i cili ka ndodhur dy ditë më parë në Spitalin Rajonal të Elbasanit, ku shtetasi A.K. tentoi të vriste me mjet të mprehtë, 36-vjeçarin D.B.
Njoftimi i plotë
Ju vendosim në dispozicion vendimin e shkurtuar Nr. 706 “Për vleftësimin e arrestimit të ndalimit të të dyshuarit dhe caktimin e masës së sigurisë” për shtetasin K.D., akuzuar për veprën penale të “Shpërdorimit të detyrës”. parashikuar nga neni 248 i Kodit Penal.
Sot më datë 13.10.2024, Gjykata e Shkallës së Parë e Juridiksionit të Përgjithshëm Elbasan me trup gjykues të përbërë nga Gjyqtar z. Ardit Kuka në përfundim të gjykimit vendosi:
1. Pranimin e kërkesës.
2. Vleftësimin e ligjshëm të ndalimit të personit nën hetim K.D., i ndaluar nga policia gjyqësore, si i dyshuar për kryerjen e veprës penale të “Shpërdorimit të detyrës” të parashikuar nga neni 248 i Kodit Penal.
3. Caktimin e masave të sigurimit personal “Detyrimit për t`u paraqitur në policinë gjyqësore”, “Ndalimit të daljes jashtë shtetit ”dhe “Pezullimit të ushtrimit të detyrës a shërbimit publik” të parashikuar nga nenet 233, 234 dhe 242 të Kodit të Procedurës Penale për personin nën hetim Klidit Dodi
4. Urdhërohet personi nën hetim K.D., që të paraqitet në policinë gjyqësore javën e parë dhe të tretë të çdo muaji, ditë e hënë, ora 12:00.
5. Urdhërohet personi nën hetim K.D., që të mos largohet nga territori i Republikës së Shqipërisë.
6. Urdhërohet personi nën hetim K.D., që të depozitojë pranë prokurorisë mjetet e identifikimit pasaportë dhe kartë identiteti.
7. Urdhërohet pezullimi nga detyra e mjekut e personit nën hetim K.D.
8. Urdhërohet lirimi i menjëhershëm nga paraburgimi i personit nën hetim K.D., nëse nuk mbahet për ndonjë masë sigurimi tjetër ose dënim penal tjetër.
9. Ngarkohet Prokuroria pranë Gjykatës së Shkallës së Parë të Juridiksionit të Përgjithshëm Elbasan për ekzekutimin e këtij vendimi.
10. Shpenzimet gjyqësore lihen siç janë bërë.
11. Kundër këtij vendimi lejohet ankim në Gjykatën e Apelit të Juridiksionit të Përgjithshëm, brenda 5 (pesë) ditëve, duke filluar ky afat nga dita e nesërme e njoftimit të arsyetuar të tij.
Palët e pranishme morën dijeni.
U shpall në Elbasan, më datë 13.10.2024.
