Shkarkohet nga detyra, drejtori i Policisë së Tiranës, Kastriot Skënderaj. Lajmi bëhet i ditur nga ministri i Brendshëm, Sandër Lleshaj.
“Vendimi i kreut të Policisë së Shtetit për lirimin nga detyra të drejtuesit të Policisë së Tiranës është reagimi i duhur. Nuk mjafton që Policia të jetë ligjërisht në rregull. Prej saj kërkohet më shumë. Ajo duhet të jetë dhe me mendje e zemër në lartësinë që e kërkon ndjeshmëria dhe interesi i publikut. Jo si sot, tek rruga e shkollës “Petro Nini“!
Në vend të Kastriot Skënderaj është komanduar Dhimitraq Ziu. Një vendim gjykate i formës së prerë për shembjen e një banesë pranë shkollës “Petro Nini” ka sjellë përplasjen mes banorëve dhe përmbarimorëve. Banesa që pritet të shembet, në të cilën jetojnë 5 familje, është ndërtuar mbi një truall që me vendim gjykate i ka kaluar pronarit. Por banorët pretendojnë se pronari ka falsifikuar dokumentet dhe e ka fituar në mënyrë të jashtëligjshme pronën.
Banorët kishin nisur procese gjyqësore kundër pronarit dhe përmbaruesve, por kishin hequr dorë pas premtimit të pronarit për t’u dhënë shtëpi në pallatin që do të ndërtohet, premtim që ata thonë se ai nuk e ka mbajtur duke prishur njëanshmërisht një kontrate noteriale. Në mbështetje të përmbaruesve ishte edhe Policia e Shtetit, që ka hasur në kundërshtinë e banorëve. Veprimet e Policisë së Shtetit sollën reagime të shumta./Opinion.al
