TIRANE- KLSH kallëzon në prokurori kryetarin e Bashkisë Kavajë, Elvis Roshi, 2 drejtorë të bashkisë, 2 ish-drejtorë, 3 përgjegjës sektori, dhe 3 punonjës të tjerë të bashkisë Kavajë. Sipas organit të akuzës Roshi dhe vartësit e tij i kanë shkaktuar buxhetit të shtetit një dëm prj 230 mijë eurosh.
Sic bëhet e ditur sot (e premte) Kontrolli i Lartë i Shtetit ka pasur si objekt të kontrollit punën e bashkisë në dy vjet Janar 2013- Dhjetor 2014 ku ka gjetur një sërë shkeljesh. KLSH e akuzon Elvis Roshin dhe 10 punonjës të tjetër të Bashkisë për “Shpërdorim detyre” dhe “Shkeljes së barazisë së pjesëmarrësve në tendera apo ankande publike”.
Shkeljet e Roshit ne tendera
Tenderat për “Ndriçimin e shëtitores Indrit Cara” dhe “Rikonstruksion e Rrugës Dhimitër Pjeshkazini” janë kryer në shkelje të hapur të ligjit, pasi janë shpallur fitues, firma me oferta më të larta dhe skualifikuar ato me ofertë të ulta. Po kështu në tenderat “Rikonstruksion i rrugës Çezmja e Sharrës”, “Rikonstruksion i Rrugës Besa” dhe “Rikonstruksion i Rrugës Skuraj (faza e II ndriçimi)”, janë skualifikuar padrejtësisht firmat që duhet të ishin shpallur fituese. Po sipas KLSH, Bashkia e Kavajës ka shkelur ligjin për Prokurorimet Pbulike edhe në rastet: Blerje karburanti, mbjellje pemësh dekorative përgjatë Shëtitores Josif Budo” dhe ndriçimi i shëtitores “Indrit Cara”. Janë në total 13 shkelje në tendera që ka konstatur KLSH për dy vite në Bashkinë e Kavajës.
Shkeljet në urbanistikë
Janë konstatuar 12 shkelje, ku bashkia ka miratuar strukturë ndërtimore për objekte private që nuk ishin zbatuar distancat nga kufiri i pronës. Në 20 raste të miratimit të lejeve zhvillimore të ndërtimit për punime në infrastrukturë, nuk ishte plotësuar dokumentacioni përkatës teknik e ligjor. Nuk ishte ngritur qëllimisht Këshillit Teknik i Bashkisë, organi kryesor në drejtim të kualifikimit dhe certifikimit të lejeve zhvillimore apo dhe leje përdorimi. Nuk ishin hedhur qëllimisht të dhënat e aplikimeve për leje zhvillimore në Regjistrin e Planifikimit të Territorit”, të gjitha këto shkelje të listuara në raportin e KLSH për Bashkinë Kavajë.
Për të gjitha shkeljet, KLSH ka kallëzuar penalisht kryetarin e Bashkisë, Elvis Roshi dhe 9 drejtorë e përgjegjës të Bashkisë Kavajë. Ndërsa ka rekomanduar dhënien e masave të ndryshme disiplinore dhe administrative, për 56 punonjës të Bashkisë Kavajë. Për disa prej tyre ka kërkuar largim nga puna.
