Gjykata Kushtetuese ka vendosur të pranojë për të marrë në shqyrtim kërkesën e Presidentit Ilir Meta për shfuqizimin e ligjit që i hap rrugën projektit të Teatrit të ri Kombëtar, duke e kaluar çështjen në seancë plenare.
Për këtë, Gjykata Kushtetuese i është drejtuar me shkresë 5 institucioneve, duke kërkuar që deri më datë 22 janar 2020 të dërgojnë argumentet e tyre mbi këtë çështje.
Shkresat u janë dërguar Ministrisë së Financave, Ministrisë së Kulturës, Bashkisë së Tiranës, Kuvendit të Shqipërisë dhe Këshillit të Ministrave, ku theksohet se argumentet e këtyre institucioneve çmohen si të domosdoshme për zhvillimin korrekt të gjykimit.
Vendimi për të kaluar çështjen në seancë plenare me dyer të hapura është marrë nga Kolegji i Gjykatës Kushtetuese më datë 24 dhjetor 2019, ndërkohë që në bazë të Ligjit për funksionimin e Gjykatës Kushtetuese, për ta gjykuar çështjen në seancë nevojitet një kuorum prej 6 anëtarësh.
Aktualisht Gjykata Kushtuese përbëhet nga 4 gjyqtarë, pas largimit prej vettingut të Besnik Muçit, gjë që ja pamundëson nisjen e gjykimit të çështjes.
Lajmi vjen në një moment, kur Aleanca për Mbrojtjen e Teatrit i kërkon Bashkisë së Tiranës të bëjë transparencë me procedurat e tenderit për ndërtimin e Teatrit të Ri. Artistë, juristë e përfaqësues të shoqërisë civile dyshojnë se bashkia ka shpallur në mënyrë të fshehtë kompaninë fituese që do ndërtojë godinën e re të Teatrit Kombëtar. / Opinion.al
