Është shoqëruar me debate dhe përplasje mbledhja e sotme në Komisionin Parlamentar të Edukimit, kur ishte duke raportuar ministrja e Kulturës, Elva Margariti për dhënien me koncesion të Butrintit. Ka qenë deputetja e Partisë Demokratike, Ina Zhupa, e cila është përplasur me ministren.
Zhupa në fillim i ka kërkuar drejtuesit të Komisionit Petro Koçit, që të mos i jepte fjalën Ministres Margariti, duke përplasur edhe dorën mbi tavolinë, ndërsa tha se marrëveshja për dhënien e Butrintit me koncesion 10 vjeçar është sekret.
Më tej situata është agravuar. Teksa Zhupa tha se Butriniti nuk duhet të trajtohet si mall, ka shkuar tek vendi ku ndodhej ministrja Margariti dhe i ka hequr mikrofonin.
SHERRI NË KOMISION
Ina Zhupa duke i rënë tavolinës: Harroje ti nuk vazhdon, zonja ministre ti nuk vazhdon. Çohuni ju lutem kolegë. Ne jemi komision përgjegjës. Zoti Petro po shkel rregulloren. Zonja ministre, nuk kalohet kështu. Zoti Petro po shkel rregulloren
Petro Koci: Nuk je ti komandantja.
Ina Zhupa: Të lutem, do të japë ajo si mall Butrintin, siç dha Teatrin. Nuk vazhdon ti.
Elva Margariti: Të pëlqen apo nuk të pëlqen do ta dëgjosh deri në fund.
Ina Zhupa: Nuk të vjen zor, je njëri që ke dhënë teatrin tani kërkon të japësh Butrintin. Kjo është marrëveshja jote e turpit. Të të vijë zor nga vetja. Turp turp turp. Edhe ju të gjithëve t’ju vije turp.
Njerëz të papërgjegjshëm. Unë zonjë nuk ju lë këtu të bëni bla bla bla. Të të vijë zor. Pse është marrëveshja sekrete? Të të vijë zor. Njerëz të papërgjegjshëm.
