Ishte muaji shtator, i një viti më parë kur deputeti i dalë nga lista e PS-së do të akuzonte drejtuesit e policisë së Laçit si të korruptuar dhe të paaftë. Deklarata e Gjetan Gjetanit u bë pasi në atë kohë, në harkun kohor të 8 orëve u vranë dy të rinj.
Por kjo deklaratë e tij do t’i kushtonte përjashtimin nga Partia Socialiste. Nga mbledhja e asamblesë Kombëtare të PS, Edi Rama do të deklaronte: Nuk po e shoh këtu dhe ka bërë shumë mirë që nuk ka ardhur. Deputeti i PS i Kurbinit duhet përjashtuar nga PS. Nuk ka bërë asnjë punë por ka shantazhuar dhe ka bërë presion dhe kërkon ekskluzivet të vendosë shefa policish në Kurbin, e më pas del e flet kundër punës së Policisë së Shtetit. Ai nuk duhet të jetë më deputet i PS. Duhet të jetë mësim për deputetet për të ndarë njëherë e mirë punën nga futja e hundëve nga ndërtimi i shtetit. Se faturat e hajdutëve në hipoteka që janë futur me mbështetje politike dhe farefisnorë nuk i marrin ata që ndërhyjnë por i merr PS.
Dhe tani duket se deputeti Gjetan Gjetani kishte të drejtë. Kur kanë kaluar disa muaj nga ky zhvillim, të dielën dy të rinj u vranë me armë zjarri mes qytetit të Laçit pas një sherri banal.
Një nga autorët e dyshuar të vrasjes së dy të rinjve është dhe Markel Bushi, person me precedent penal dhe i njohur për drejtësinë shqiptare. Ai ishte në kërkim, por një gjë e tillë nuk përbënte aspak shqetësim për të që të lëvizte i lirë në mes të qytetit, madje të përfshihej në një ngjarje tjetër kriminale pak metra larg nga komisariati i policisë.
Për këtë sigurisht një përgjigje duhet të jap ministri i ri i Brendshëm, që siç ndodh rëndom në ngjarjet e fundit kriminale përfshirë dhe grabitjen e Rinasit, autorët jo vetëm që i kanë shpëtuar policisë por kanë hapur dhe biznese dhe kanë jetuar në zonat më të preferuara të Tiranës.
Por kush është Markel Bushi? Në vitin 2012 ai së bashku me shokun e tij, Daniel Shyti vodhën disa vajza që po shkonin në Kishën e Laçit dhe njërën prej tyre e qëlluan me armë. Pas ngjarjes ata u arrestuan. Gjykata e dënoi Danjel Shtyin me 6 vite burgim në vitin 2013. Ndërkohë që Markel Bushi nisi gjykimin e tij në gjykatë duke mos kërkuar as gjykim të shkurtuar, por më pas arriti të arratisej duke u dënuar në mungesë me 9 vite burg.
Prej vitit 2013, ai ndodhej në kërkim nga policia nën akuzën e vjedhjes me armë. Në 21 nëntor të 2017, policia organizoi një operacion për arrestimin e tij, por Markel Bushi qëlloi me armë në drejtim të efektivëve dhe arriti që të humbte gjurmët duke u arratisur.
A ka dështuar policia në arrestimin e njerëzve që janë në kërkim? Të paktën faktet flasin që PO, pavarësisht deklaratave politike që mund të bëjë ministri për ulje të kriminalitetit. /Opinion.al
