“Është mirë për ne të flasim sinqerisht dhe së bashku. Ne jemi të udhëhequr nga fakti se i gjithë rajoni mund të zhvillohet”. Me këto fjalë e përshkruan kancelaria gjermane Angela Merkel samitin e organizuar në Berlin me liderët e Ballkanit Perëndimor, ku i pranishëm ishte edhe presidenti francez Emmanuel Macron.
Kancelarja Merkel në rrjetet sociale po ashtu ka publikuar dhe fotot me liderët, kur ishte i pranishëm dhe kryeministri Edi Rama.
Po ashtu është publikuar dhe drafti i deklaratës së përbashkët. Dokumenti, pasi cilëson marrëveshjen e Prespës midis Maqedonisë së Veriut dhe Greqisë si një “shembull i shkëlqyer” për zgjidhjen e një konflikti, nënvizon rëndësinë e një marrëveshje midis Kosovës dhe Serbisë ne kuadër të stabilitetit të Rajonit, si dhe të aspiratave evropiane të dy vendeve.
Sipas draftit, vendet pjesëmarrëse ranë dakord që kjo zgjidhje duhet të jetë “e tërthortë, politikisht e qëndrueshme dhe kontribuues e stabilitetit”. Sipas dokumentit, Serbia dhe Kosova dakordësuan që të përshpejtojnë marrëveshjet ekzistuese dhe të angazhohen sërish në dialogun mes tyre, me ndërmjetësimin e BE-se me objektivin e një marrëveshje definitive.
Pjesëmarrësit dakordësuan gjithashtu edhe mbi rëndësinë e një zone ekonomike rajonale, dhe të bashkëpunojnë sipas direktivave të Procesit të Berlinit, që ka si bazë ekonominë, tregtinë e lirë, bashkëpunimin rajonal në tema si siguria, shkëmbimin e të rinjve, ndër të tjera. Ndërkohë, vendet konfirmuan angazhimin në luftën kundër terrorizmit dhe trafiqeve ilegale, si dhe të trafikut të qenieve njerëzore.
Përkushtim ndaj demokracisë, respektimit të ligjit, krimit të organizuar dhe përforcimit te shoqërisë civile dhe medies të pavarur ishte një angazhim tjetër i vendeve pjesëmarrëse./Opinion.al
