Vesna Vuloviç
Më 26 janar 1972, 22-vjeçarja Vesna Vuloviç, ishte duke udhëtuar në avionin jugosllav Douglas DC-9, ku punonte si stjuardesë. Avioni shpërtheu papritmas në ajër mbi fshatin Srbska Kamenice në Çekosllovaki. Ai u nda në disa pjesë, dhe rrënojat e tij së bashku me 28 personat në bord, ranë pas 3 minutash në një mal me borë.
Një gjerman i apasionuar pas ecjes në natyrë, i cili mbërriti i pari vendin e aksidentit, pa se të gjithë pasagjerët e avionit kishin vdekur, përveç saj. Vesna ishte plagosur rëndë, por ishte ende gjallë. Në spital, prindërve të saj iu tha që vajza nuk do të mbijetonte dot. Kafka, të dyja këmbët, dhe 3 rruaza të shtyllës kurrizore, ishin thyer. Por për habinë e të gjithëve, 3 ditë më vonë ajo doli nga koma, dhe kërkoi të pinte një cigare.
Vesna ishte paralizuar nga mesi e poshtë, por ishte gjallë dhe e vetëdijshme. Ajo iu nënshtrua disa operacioneve të tjera, dhe më pas ishte në gjendje të ecte sërish. Shtatorin e vitit 1973, linja ajrore i dha asaj një punë në aeroport. Vesna nuk pati kurrë ndonjë traumë psikologjike nga ai aksident, dhe as ndonjë fobi nga fluturimi me avion.
Vesna ka hyrë në rekordin Guinnes si personi që i ka shpëtuar hedhjes më të lartë pa parashutë.
Frane Selak
Historia e pabesueshme e jetës së tij fillon në dimrin e vitit 1962, kur treni i linjës Sarajevë – Dubrovnik, ku ishte edhe ai, doli nga binarët dhe përfundoi në lumin e akullt. Ndërsa shumë bashkudhtarë u mbytën ose vdiqën nga plagët, Frano me shpatullën e thyer notoi deri në breg dhe shpëtoi. Ky është vetëm fillimi i asaj që do të ndodhte në 40 vitet e ardhshme të jetës së Frano Selak.
Vetëm një vit më vonë, dera e një aeroplani shpërtheu duke shkaktuar vdekjen e 19 personave. Selak i cili fluturoi bashkë me derën, arriti të mbijetonte dhe ra mbi një grumbull kashte, pa dëmtime serioze.
Në vitin 1966 autobusi ku ndodhej doli nga rruga, dhe ra në një lumë ku humbën jetën 4 pasagjerë. Selak arrin të mbijetojë sërish.
Por këto nuk ishin të vetmet takime të tij me vdekjen pasi në vitin 1970 vetura e tij mori flakë por ai ia doli të largohet para se ajo të shpërthente tërësisht, incident që përsëritet vetëm tre vite më vonë.
Pas të gjithë këtyre ndodhive, Selak në vitin 2003 fitoi një milion dollarë në lotari duke pushtuar të gjitha kopertinat e revistave dhe gazetave prestigjoze të botës. Ai u cilësua nga media dhe njerëzit “njeriu pa fat më me fat në botë, ndërsa shumë artikuj, filma dhe dokumentarë janë përpjekur të portretizojnë të gjitha peripecitë e jetës së tij.
Skuadra e ragbyt të “Stella Maris College”nga Uruguai
Skuadra u nis për një ndeshje miqësore por u përplasen në Ande. Përplasja e avionit shkaktoi 12 viktima, ndërsa të mbijetuarit u detyruan të qëndrojnë në male në temperatura që arrinin -30 gradë. Teksa rezervat ushqimore po iu mbaronin, të shpëtuarit humbën të gjithë shpresat e tyre kur dëgjuan në radio se kërkimet për ta ishin ndërprerë dhe ata ishin shpallur të vdekur. Në kushtet më ekstreme të mbijetesës ata filluan të vdisnin një nga një, ndërsa ata që mbetën gjallë filluan të ushqeheshin me trupat e viktimave, në sajë të përpjekjeve të dëshpëruara për të mbijetuar. Pas 72 ditëve nga përplasja, dy prej tyre arritën të shkonin në këmbë deri në Kili, ku njoftuan se 16 persona të tjerë ishin në mes të maleve.
Mauro Prosperi
Mauro mori pjesë në një maratonë në vitin 1994 në Marok. Maratona u ndërpre nga një stuhi e fuqishme rëre, e cila bëri që Mauro të humbiste rrugën e tij. Ai eci në drejtim të Algjerisë, teksa u gjet nga disa kalimtarë të rastit, të cilët e çuan në një bazë ushtarake ku mori mjekimin e duhur. Ai tha se kishte mbijetuar 9 ditë duke pirë urinën e tij, dhe duke u ushqyer me gjarpërinj dhe insekte./Opinion.al
