Deputetja e PD, Jorida Tabaku gjatë fjalës së saj nga foltorja e Kuvendit tregoi se bashkë me fëmijët e tjerë që erdhën në sallë ishin edhe dy vajzat e saj binjake.
Ajo tha se ishte e emocionuar se vajzat kishin ardhur për të vizituar punën e mamin, ndërsa Tabaku u shpreh se sot u bind se brezi i ri s’duhet të merret me politikë, pas fjalëve të kryeministrit Rama.
“Nga viti 2013 e sot kam mbajt shumë fjalë në këtë Parlament, por në fakt më parë u emocionova pasi dy vajzat e mia 5 vjeçare, Arba dhe Iris, bashkë me grupin e tyre të kopshtit, erdhën për të parë punën e mamit. Edhe unë për të justifikuar ato mungesat e gjata, lodhjen dhe stresin që çoj në shtëpi, me ndihmën dhe të kryetares së Kuvendit, pranova që mund të vinin.
Unë në fakt nuk dua që fëmijët e mi të merren me politikë. Ato do të bëjnë çfarë të duan dhe mund të zgjedhin vetë çfarë duan të bëjnë, por dita e sotme në fakt më mbushi akoma dhe më shumë mendjen që zgjedhja për t’u marrë me politikë ndoshta nuk është në të ardhmen e fëmijëve shqiptarë me atë që panë dhe dëgjuan sot në sallën e këtij Kuvendi”,-tha Tabaku./Opinion.al
