Kryesore

Tabaku: Rama po bën të kundërtën e asaj që premtoi, borxhi 80% e PBB


Bëhu pjesë e Grupit Zyrtar të Opinion.al
>> KËTU <<
               Publikuar në : 13:26 - 07/07/20 |
Al Do

Ish-deputetja e Partisë Demokratike, Jorida Tabaku, tha në një deklaratë për mediat se rishikimi i borxhit nga qeveria për herë të dytë brenda 6 muajve është shpallja e falimentit të qeverisë.

“Akti normativ i miratuar nga qeveria vulos rënien ekonomike të vendit, që sipas Bankës Botërore pritet të jetë me 9% të prodhimit kombëtar. Është akti që bën shqiptarët më të varfër, që zyrtarizon shkurtimin e mijëra vendeve të punës dhe që paralajmëron se në xhepat e qytetarëve do të ketë më pak të ardhura dhe më shumë borxhe”, tha ajo.

Tabaku publikoi edhe një video të vitit 2010, ku Rama kritikonte nivelin e borxhit publik të asaj kohe që ishte në nivelin 60%.

“Politikani që erdhi në pushtet duke mallkuar kundërshtarin për një borxh atëherë të kujdesshëm, sot ka vendosur të heqë kufirin ligjor të marrjes së borxhit, duke mos pasur më asnjë kufizim në marrjen e tij.  Edhe për borxhin, Edi Rama po bën të kundërtën e asaj që premtoi.

Tani, që është në pushtet, me borxhet e marra, Edi Rama nuk rrit rroga, nuk rrit pensione, nuk hap vende pune, nuk ndihmon biznesin, nuk ul taksat. Me borxhet e marra ka  bërë 500 milionë euro fasada me pllaka në qytete që sot përmbyten me shiun e parë, paguan 120 milionë euro në vit koncesionet dhe inceneratorët.

Sipas përllogaritjeve të qeverisë, borxhi publik është 80% e Prodhimit të Brendshëm Bruto, por borxhi real është shumë më i lartë. Ai shkon 11 miliardë euro ose 93% e prodhimit kombëtar, nëse qeveria do të përfshinte aty edhe borxhin e fshehur të PPP-ve.

Me Edi Ramën ka vetëm krizë ekonomike, ka vetëm varfëri.  Në shtatë vjet shqiptarët janë rrjepur dhe vjedhur nga një qeveri e papërgjegjshme, e cila nuk ka investuar në shërbim të tyre, por ka shpërdoruar para për interesin personal”, mbylli deklaratën e saj Jorida Tabaku. /Opinion.al

Pas