Kryetarja komisionit hetimor për inceneratorët Jorida Tabaku, shprehet se personat e akuzuar për abuzime në tenderat e inceneratorëve të hetohen si grup i strukturuar kriminal.
Tabaku thotë se afera korruptive nuk është bërë vetëm nga dy persona, por aty përfshihen edhe zyrtarë të tjerë të lartë. Deputetja e PD-së shprehet e vendosur për t’i shkuar deri në fund kësaj cështje.
“Hetoni Grupin e Strukturuar Kriminal pas Inceneratorëve! Afera e inceneratorëve nuk është një aferë kriminale mes dy individëve. Përkundrazi ajo është një aferë kriminale e organizuar dhe zbatuar nga një Grup i Strukturuar Kriminal që ka pasur për qendër operacionale institucionet e qeverisë shqiptare. Sot kemi vetëm një të arrestuar që ka qenë pjesë e këtij Grupi të Strukturuar Kriminal. Të lirë vazhdojnë të jenë Stela Gugallja, bashkëshorti i saj Klodian Mërtiri dhe Klodian Zoto pasi ato janë lajmëruar më herët për këto arrestime dhe janë zhdukur. Ne nuk tërhiqemi nga hetimi i plotë i kësaj afere kriminale për t’ia sqaruar shqiptarëve si janë vjedhur. Javën që nis Komisioni Hetimor i Inceneratorëve mblidhet për të miratuar planin e hetimit dhe nisur shkresat e radhës! SPAK mos të mjaftohet me Lefter Kokën që nuk është koka por bishti”,-shkruan Tabaku./Opinion.al
