Dy nxënës janë paguar për ta identifikuar mësuesin, i cili u vra me prerje koke pak ditë më parë në Paris. Këto janë pretendimet e prokurorëve për krimin që ka tronditur Francën.
Samuel Paty është shënjestruar nga agresori për shkak se ka shfaqur karikaturat e Profetit Muhamed para nxënësve të tij në klasë.
Vrasësi i tij, 18-vjeçari, Abdullakh Anzorov, është qëlluar për vdekje nga policia, pak pasi ka kryer sulmin. Të mërkurën, prokurorët kanë thënë se Anzorov ka paguar dy nxënës rreth 300 euro për ta identifikuar Patyn.
Vrasësi u ka thënë nxënësve se dëshiron “ta incizojë mësuesin dhe ta bëjë atë të kërkojë falje për prezantim të karikaturave të Profetit Muhamed”, ka thënë prokurori kundër terrorizmit, Jean-François Ricard në një konferencë për media.
Ai ka thënë se Anzorov u ka thënë atyre se dëshiron “ta qëllojë atë”. Nxënësit e moshave 14 dhe 15-vjeçare, supozohet se e kanë përshkruar Patyn dhe kanë qëndruar mbrapa sulmuesit për më shumë se dy orë jashtë shkollës, derisa është shfaqur mësuesi.
Dy fëmijët, emrat e të cilëve nuk janë bërë publikë për arsye ligjore, janë dy prej shtatë personave që autoritetet franceze synojnë t’i gjykojnë për sulmin brutal.
