Presidenti i Shteteve të Bashkuar të Amerikës, Barack Obama, e ka quajtur masakër të tmerrshme, sulmin në një klub nate në Orlando ku mbetën të vdekur 50 persona dhe 53 të tjerë u lënduan.
Obama, në një konferencë për media nga Shtëpia e Bardhë, ka thënë se FBI po vazhdon hetimet, pasi akti po cilësohet si një sulm terrorist.
“Ajo që ka ndodhur është masakër e tmerrshme, dhe sot lutemi për familjet që po presin përgjigje me zemër të thyer. Ende jemi herët në hetime, por mund të themi se ky ishte një akt i terrorit dhe i urrejtjes”, ka thënë Obama për sulmin e Omar Mateen, i cili u vra nga njësitet policore SWAT, pas ndërhyrjes së tyre për të shpëtuar pengjet.
“Sapo kam përfunduar takimin me FBI, ata janë në vendngjarje dhe po përcjellin gjithçka me njësitet lokale. Ende po mësojmë për faktet, dhe hetimet po vazhdojnë. FBI po e heton si një akt të terrorizimit. Por çfarë është e qartë deri më tani është se ai ishte një person i mbushur me urrejtje”.
Obama ka thurur lavde për policët që arritën ta eliminojnë sulmuesin.
“Shprehim falënderimin tonë për policinë, sidomos për ata që të parët intervenuan në skenën e krimit. Guximi i tyre shpëtoi jetë dhe kjo është sakrifica që ata bëjnë çdo ditë për ne. Çfarëdo ndihme që i duhet Orlandos ata do ta kenë mbështetjen tonë”.
Obama ka folur edhe problemin dhe debatin e madh në Amerikë – të drejtën për të blerë armë.
Siç është mësuar, sulmuesi ishte truproje dhe kishte lehtësisht qasje në armë.
“Kjo masakër tregon sa lehtë e ka dikush të pajiset me armë dhe të sulmojë. Dhe ne duhet ta shqyrtojmë këtë dhe të ndërmarrim diçka”.
Gjithsesi, sipas presidentit të SHBA-ve, asnjë sulm i tillë nuk mund të zbeh vlerat demokratike amerikane.
“Vendi ku është kryer sulmi është më shumë se klub nate, është vend i solidaritetit. Çdo sulm që prek grupe të veçanta, racore, religjioze, seksuale, është sulm mbi ne si popull, por asnjë sulm nuk mund ta ndryshojë ata që jemi dhe të zbehë vlerat tona”.
“Në orët dhe ditët e ardhshme do të mësojmë për viktimat, emrat e tyre fytyrat dhe kush ishin ata. Ne lutemi për ta dhe për familjet e tyre”, ka deklaruar Obama.
