Qindra banorë kanë nisur të largohen nga Teherani dhe të shkojnë drejt fshatit, ndërsa sulmet izraelite në kryeqytetin iranian u përshkallëzuan, me bomba që ranë në ndërtesa banimi dhe qeveritare.
Banorët shprehen se shpërthimet vazhdojnë njëra pas tjetrës dhe fëmijët ndjehen tepër të frikësuar.
“Kjo është një masakër. Shpërthimet nuk kanë të ndalur. Fëmijët qajnë dhe kemi frikë se shumë civilë janë vrarë. Ka një erë vdekjeje në ajër. Nuk mund të ndalem së qari”, tha për Guardian një 25-vjeçar.
Autoritetet nuk dhanë asnjë numër zyrtar të vdekjeve, por dyshohet se të paktën 138 njerëz janë vrarë dhe qindra të plagosur nga sulmet në Iran që nga e premtja.
Bombardimet nisën herët në mëngjesin e së premtes, kur Izraeli nisi qindra sulme në atë që ai tha se ishte një operacion që synonte parandalimin e Iranit nga marrja e një arme bërthamore.
Irani u përgjigj shpejt me një breshëri raketash balistike dhe ka vazhduar të godasë Izraelin, duke vrarë 10 njerëz, përfshirë tre fëmijë, në sulmet ndaj ndërtesave të banimit të shtunën mbrëma.
Ndërsa konflikti vazhdoi të përshkallëzohej, autoritetet iraniane njoftuan se do të hapnin stacionet e metrosë dhe shkollat e Teheranit për t’i përdorur si strehimore.
Egërsia e sulmit izraelit i kapi qytetarët dhe qeverinë e Iranit në befasi. Ndërsa raketat iraniane fluturonin drejt Izraelit, ushtria e tij dukej e paaftë për të ndaluar sulmet izraelite.
Kishte skena kaosi në rrugët e Teheranit ndërsa banorët nxituan të blinin ushqime mes bombardimeve përpara se dyqanet të mbylleshin.
Ndërsa banorët rrinin në radhë për karburant, ose për para në ATM, një ndjenjë paniku filloi të përhapej pasi sulmeve iu bashkuan bombardimet me makina, që thuhet se synonin shkencëtarët bërthamorë iranianë.
Ekspertët thanë se sulmi i Izraelit kishte ardhur në një pikë kritike për qeverinë iraniane, e cila është tronditur nga protestat vitet e fundit dhe nga një krizë e thelluar ekonomike.
