Kryetarja e Parlamentit Elisa Spiropali, ndodhet në vizitë dy ditore zyrtare në Bullgari, ku ka mbajtur një deklaratë për media së bashku me homologen e saj, Nataliya Kiselova.
Në fjalimin e saj, Spiropali e vuri theksin te bashkëpunimi i ngushtë që ka Shqipëria dhe Bullgaria, ashtu sikurse mbështetja e kësaj të fundit për vendin tonë.
Spiropali u ndal dhe tek rrugëtimi i Shqipërisë në unionin evropian, duke e cilësuar se vendi ynë është pararojë për rrugën drejt Bashkimit Evropian.
“Procesi i integrimit të Shqipërisë, siç e thatë ju po shkon mbarë. Shqipëria në fakt, është një vend pararojë, ndër vendet kandidate për Bashkimin Evropian në Ballkanin Perëndimor. Ne jemi shumë të vetëdijshëm që ky është një proces i bazuar në meritë, edhe në reformat e gjithsecilit vend. Po ashtu, kuptojmë se gjeopolitika e re në Evropë, e nevoja për më shumë siguri, na sjell më afër njëri-tjetrit, e sjell nevojën për të bashkëpunuar edhe në fushën e sigurisë. Urojmë që ajo marrëveshje, siç ishte marrëveshja e nënshkruar mes Shqipërisë, Kosovës, edhe Kroacisë, të mund të zgjerohet edhe me aleatë të tjerë në rajonin tonë, siç është Bullgaria”, tha Spiropali.
Kryetarja e Parlamentit u shpreh se synimi i vendit tonë është çelja e gjithë kapitujve anëtarësuese në BE brenda këtij viti, e procesi teknik i negociatave të përfundojë deri në 2027. Pas këtyre, vjen ambicia për anëtarësimin e plotë të Shqipërisë në unionin evropian, brenda kësaj dekade.
“Shqipëria, vërtet ka çelur 24 kapituj, por ne duam që brenda këtij viti të mund të çelim të gjithë kapitujt, e brenda vitit 2027, të mund të mbyllim procesin teknik të negociatave, për të anëtarësuar Shqipërinë brenda kësaj dekade në Bashkimin Evropian”, tha ajo.
Mesazh dha dhe për thellimin e bashkëpunimit ekonomik, ashtu sikurse dhe politike mes Shqipërisë dhe Bullgarisë. Investimet bullgare në Shqipëri janë të mirëpritura, u shpreh Spiropali.
“E në fund, sa i takon shkëmbimeve, duhet patjetër që ne të thellojmë patjetër shkëmbimet tona tregtare, ekonomike, investimet në infrastrukturë, siç është Korridori VIII, apo në turizëm, që janë fusha prioritare për të dyja vendet. Kjo marrëdhënie e shkëlqyer, miqësore, mes vendeve tona, por edhe politike, duhet të përkthehet e në më shumë mirëqënie për qytetarët tanë. Duke nisur nga investimet bullgare, të cilat janë të mirëpritura por edhe shkëmbimet e tjera. Shkëmbimet tregtare, në fushën e turizmit… e kemi një marrëveshje të nënshkruar nga tetori i 2024, marrëveshja për bashkëpunimin në fushën e pensioneve apo sociale, e ajo ka hyrë në fuqi. Urojmë që këto marrëveshje, që kanë impakt të drejtpërdrejtë ekonomik në jetën e qytetarëve tanë, të mund të shkojnë më tej”, u shpreh kryeparlamentarja.
Nataliya Kiselova, siguroi se Bullgaria do të qendrojë si forcë mbështetëse për Shqipërinë.
“Veç përkrahjes që ne do të sigurojmë në marrëdhënien dypalëshe ne do të jemi pranë Shqipërisë dhe do të asistojmë në çdo hap të rrugës së Shqipërisë në BE. Sepse, koncepti i Bullgarisë është se çdo shtet duhet të ecë sipas meritave të veta dhe në bazë të kritereve të Kopenhagës për anëtarësim në BE. Shpresoj se bashkëpunimi ndërparlamentar do të vazhdojë dhe gjatë Parlamentit të ardhshëm, që pas zgjedhjeve të 11 Majit, do të konstituohet në shtator dhe ky është mandati i katërt i z.Edi Rama, të cilit i urojmë sukses në këtë mandat. Tani është momenti t’i tregojmë zonjës Spiropali edhe sallën e Parlamentit.”, tha Kiselova.
