Ministrja e Shtetit për Marrëdhëniet me Parlamentin, Elisa Spiropali ka thënë se presidenti Meta kërkon “të vrasë” reformën në drejtësi.
Me anë të një statusi në Twitter ajo thotë se presidenti, duke ju referuar si “Baba Xhikja”, epitet ky i përdorur nga kryeministri Rama, ka frikë nga reforma në drejtësi dhe kërkon ta dëmtojë atë. Ajo madje e përmend dy herë faktin se presidenti “po ikën” që lë të kuptohet për vendosmërinë e forcës së saj politike për shkarkimin e Metës.
Spiropali me anë të këtij statusi i referohet deklaratave të fundit të presidentit Meta, më konkretisht kritikës që ky i bëri implementimit të reformës në drejtësi duke e quajtur “Ramaformë”. Sipas Metës, kryeministri Rama me një pjesë të diplomatëve kanë shkelur rekomandimet e Komisionit të Venecias për implementimin e reformës duke e ndryshuar thelbësisht natyrën e saj dhe duke e vënë në shërbim të interesave të kryeministrit. /Opinion.al
Baba Xhikja na la po Reformën në Drejtësi meazallah se e lëshon në rrokullimën e tij të zhurmshme! Ajo i del në gjumë, në ujë, në bukë, madje edhe në rrugë. Të shkretit Baba Xhike nuk i iket pa e vrarë atë dreq reforme, që e sheh si top, tank, kundërshtar, agresor ndërkombëtar!
— Elisa Spiropali (@elisaspiropali) July 3, 2019
