Shefi i Shtabit të Përgjithshëm të Forcave të Armatosura, gjeneral-major Bajram Begaj pritet të votohet sot nga Parlamenti si Presidenti i ri i Republikës.
Kryeministri Edi Rama bëri të ditur dje pas mbledhjes së Kryesisë së PS-së, se mazhoranca propozoi emrin e Bajram Begajt për të marrë postin e Presidentit të ri. Ndërkohë që edhe vetë gjenerali pranoi propozimin e Ramës.
Procesi i zgjedhjes së Presidentit kalon në disa faza. Para se të shkojë në Kuvend, emri i Begajt do t’i dërgohet paraprakisht Grupit Parlamentar të PS, që do të mblidhet ditën e sotme rreth orës 10:00 dhe nga ku do të mblidhen firmat e nevojshme. Sipas Kushtetutës, duhen të paktën firmat e 20 deputetëve për mbështetjen e një kandidati për President të Republikës, që më pas do të depozitohen zyrtarisht në Kuvendin e Shqipërisë.
Afati maksimal i përcaktuar nga Konferenca e Kryetarëve është ora 12:00, ndërsa më pas, në orën 16:00 do të mblidhet komisioni i ligjeve, që do të shqyrtojë kriteret ligjore kushtetuese të kandidatit të propozuar nga PS.
Ndërsa në orën 18:00 duhet të mblidhet Parlamenti në seancë plenare për të ezauruar raundin e katërt për zgjedhjen e Presidentit, ku Bajram Begaj pritet të zgjidhet me votat e mazhorancës.
Në raundin e katërt mjaftojnë 71 vota që ai të zgjidhet në krye të shtetit, ndërsa Partia Socialiste i disponon votat për zgjedhur e vetme Presidentin e ri.
Sa i takon qëndrimit të PD, kreu i saj Sali Berisha ka deklaruar se do të votojnë kundër kandidatit të Kryeministrit Rama për President.
