Sam Allardyce, trajneri i Anglisë, ka përfunduar në qendër të kritikave. Një hetim i bërë nga e përditshmja britanike “Telegraph” ka akuzuar trajnerin e Anglisë se i ka sugjeruar disa bizensmenëve, që janë shtirur si të tillë, në fakt kanë qenë gazetarë, se si të shmangnin rregullat e TPO (Third part ownership – Pala e tretë pronare e kartonit të lojtarëve). Ish-trajneri i Sunderland, i cili ka marrë drejtimin e “Tre Luanëve” nga 22 korriku, është filmuar gjatë disa takimeve me një përfaqësues të shtirur të një kompanie nga Lindje e Mesme, që kishte deklaruar dëshirën për të fituar para nëpërmjet operacioneve financuese në merkaton e pasur të Premier League. Shpërblimi për këto këshilla duhej të ishte 400 mijë sterlina.
Në dy takimet, që kanë zgjatur 4 orë në total, Allardyce i ka shpjeguar bashkëbiseduesve të tij se sa e lehtë ishte të shmangeshin rregullat e që kanë hyrë në fuqi në 2008-ën në Angli për të rregulluar pronësinë e “kartonëve” nga ana e subjekteve që nuk janë klubi ose vetë lojtari. Ai ka shtuar edhe se ka shumë menaxherë që e bëjnë zakonisht dhe se mund të fitohen shumë para. Në këto takime ka qenë i pranishëm edhe menaxheri i tij, Mark Curtis, dhe këshilltari i tij financiar, Shane Moloney. Ndërmjetësi i këtyre takimeve ka qenë menaxheri Scott McGarvey, një mik i vjetër i Allardyce, që nuk ka qenë në dijeni të përfshirjes së gazetarëve. Në video, Allardyce ka bërë edhe komentet të ulëta kundrejt ish-trajnerit të Anglisë Hodgson dhe për zëvendësin e tij Gary Neville, për menaxhimin e Federata Angleze (fajtore se ka “shpërdoruar një shumë të çmendur” për të rindërtuar “Wembley”-in), madje edhe për princat Ëilliam dhe Harry.
“Telegraph” i ka dërguar Federatës Anglese, me e-mail, 18 pyetje në lidhje me komentet e bëra nga Allardyce. Federata nuk ka pranuar t’i përgjigjet të gjitha pyetjeve pa marrë më parë zbardhjen e të gjithë bashkëbisedimeve. Një zëdhënës është përgjigjur nëntë orë më vone, duke thënë se: “I kemi kërkuar Daily Telegraph që të na japë të gjithë informacionin e nevojshëm në lidhje me këtë çështje”. Gazetarët më pas i kanë kërkuar një koment edhe Allardyce, Curtis dhe Moloney 12 orë para publikimit të shkrimit, por askush nuk ka dashur të përgjigjet. Ndërkohë, Allardyce mësohet t’i ketë thënë miqve të tij se është në pritje të shkarkimit.
