Zgjedhjet e 30 qershorit i rrëzon vetëm Gjykata Kushtetuese. Kështu ka deklaruar në një intervistë televizive ambasadori italian Alberto Cutillo. Deri sa të ngrihet kjo Gjykatë, sipas tij procesi duhet të vijojë përpara me rezultatet që prodhoi 30 qershori.
“Nuk ka rëndësi nëse moralisht pranohen apo jo rezultatet, por ato janë fakt. Zgjedhjet e 30 qershorit mund të kundërshtohen vetëm nga një gjykate dhe këtë gjë ia kam thënë edhe të zgjedhurve të PD. Këtë vendim mund ta marri pak më vonë Kushtetuesja kur të krijohet. Tani për tani duhet të ecim përpara me këtë proces që patëm. Ama mua më bëri shumë përshtypje numri i lartë i votave të pavlefshme. Unë e shoh si notë proteste e qytetareve që duhet të lexohet mirë”, ka thënë diplomati italian.
Sipas tij Shqipëri sot ka krizë përfaqësimi. Këtë gjë ai e justifikoi jo vetëm me deputetet e rinj që janë në Kuvend por edhe me zgjedhjet lokale. Sipas Cutillos, 30 qershori është një rast unik ku pati brenda vetes edhe paradokse.
“30 qershori në aspektin juridik është një rast i vetëm, unik edhe në historinë shqiptare. Kjo krijoi edhe një klime pasigurie siç u tha në raportin paraprak të OSBE-ODIHR. Kemi një paradoks, për shembull në disa bashki ku kanë votuar 10% i votuesve, në këshilla bashkiak njëra parti ka marrë 100% . Është përgjegjësi e madhe që të votohesh nga 10% e qytetareve dhe përfaqësosh edhe pjesën tjetër”.
Sa i përket zgjidhjes së krizës, diplomati italian kërkon më shumë përgjegjsmëri nga qeveria. Ai thekson se qeveria duhet të tregojë pjekuri për dialog, jo me deklarata por me platformë.
“Të gjithë kanë përgjegjësi, por duhet të shohim përpara në mënyrë pozitive. Mendoj se qeveria është në një pozitë që nuk ka precedentë në Shqipëri dhe më gjerë. Ka të gjithë përfaqësitë politike në pushtet qendror dhe pushtet lokal. Kush ka shumë pushtet, ka edhe përgjegjësi më të madhe, per te ushtruar ne mënyrë me te mire pushtetin, ne mënyrë të përbashkët pa favorizuar njërën palë. Qeveria duhet të tregojë pjekuri për tu hapur ndaj dialogut, jo me deklara të përgjithshme por duke propozuar një platformë politike për të rinisur një përpjekje kombëtare për reformat”./ Opinion.al
