Dëshmitari Sali Çaka ka ndryshuar rrjedhën e procesit gjyqësor ndaj Shullazit dhe 4 të pandehurve të tjerë. Ai doli kundër dëshmitarit të mbrojtur nga shteti, Ylvi Beqaj duke thënë se: “Beqja më ka 150 mijë euro borxh”. Por burime nga prokuroria thanë se Çaka ka rrëfyer të kundërtën, kur është pyetur në muajin Mars, në ambientet e prokurorisë.
Së bashku me kallëzimin, prokuroria thotë se disponon dhe disa përgjime telefonike, ku Sali Çaka, thotë se nuk ka pasur borxh dëshmitarit Ylvi Beqja.
Caka si sekser i Beqjas
Mes Beqjat dhe Çakës ka pasur një shoqëri prej disa vitesh, dhe se Çaka e ka ndihmuar biznesmenin në blerjen e disa tokave, si dhe kur ka pasur proceset gjyqësore për çështjen e Vollgës, Çaka, e ka shoqëruar nga afër biznesmenin. Prokuroria shton se dëshmitari Çaka është kërcënuar dhe shantazhuar vazhdimit.
Hetimet për këtë çështje janë duke vijuar dhe se në ditët në vazhdim prokuroria pritet të dalë me konkluzione përfundimtare për këtë çështje.
Burime nga prokuroria thanë se biznesmeni Beqja ka bërë në 10 qershor të 2016 një deklaratë ku thotë se: “unë Ylvi Beqja deklaroj nën përgjegjësinë time të plotë personale dhe ligjore dhe në cilësinë e administratorit të kompanisë “Saudi Brathers Comercial Company”, se marr përsipër që në momentin kur të zhbllokohet llogaria bankare pranë bankës do ti jap Sali Çakës, shumën prej 150 mijë euro”. Kjo sasi eurosh do jepej për shkak se Çaka ka shërbyer si sekser në blerjen e disa tokave nga biznesmeni Beqja.
Mirëpo sipas prokurorisë së Krimeve të Rënda, pas një viti nga kjo deklaratë dëshmitari Ylvi Beqja është tërhequr nga ky deklarim duke revokuar deklaratën e 10 qershorit 2016. Beqja në 22 mars 2017 ka pohuar para noterit Gjergj Kongoli, duke pohuar se revokonte kontratën e pare. (dokumenti bashkëlidhur)
Tregtarët nën hetim
Gjithë tregtarët që dolën publikisht në media dhe akuzuan dëshmitarin e Prokurorisë së Krimeve të Rënda Ylvi Beqja, se ai i kishte mashtruar duke i marrë para borxh, janë thirrur në prokurori për të dhënë sqarime.
Në muajin Mars 2017 prokurorët e dosjes “Shullazi” nisën hetime ndaj Sinan Topit, Sali Cakës, Petrit Sukthit, Hamit Gordit, Agron Muçës, Skënder Kaçdeljas dhe shtetasit Ervis Martinaj, pasi dyshohet se këta persona në mënyrë të organizuar apo të shtyrë dhe kërcënuar kanë dalë në media, duke bërë deklarata kundër dëshmitarit të prokurorisë.
Personat e lartpërmendur janë marrë në pyetje nga prokurorët, ku gjatë intervistimit ata kanë hedhur poshtë deklaratat që kanë bërë në dy televizione. Sipas dëshmive para prokurorëve, dalja në televizion është organizuar nga disa persona nën kërcënimin e armëve. Disa prej tyre kanë pohuar se Ylvi Beqja nuk i ka asnjë borxh financiar.
Tashmë Prokuroria e Krimeve të Rënda është duke verifikuar me imtësi pozicionin e disa personave të tjerë, që dyshohet se nën kërcënimin e armëve kanë çuar në daljen në media të 6 tregtarëve.
Dëshmia e tregtarëve
Tregtarët para prokurorëve kanë pranuar se janë shtyrë për të folur kundër Ylvi Beqjat. Sipas tyre organizatorët e daljes së tyre në televizor janë E. M, E. P. dhe një shtetas tjetër me mbiemër Shullazi.
Burime të prokurorisë thanë se tregtarët kanë pohuar se janë kërcënuar dhe ndaj kanë pranuar të mblidhen së bashku, për të folur kundër dëshmitarit të Prokurorisë së Krimeve të Rënda, Ylvi Beqaj.
*foto kryesore: tregtarët duke folur kunder Yli Beqajt
*dokument: akti noterial ku Ylvi Beqja terhiqet nga dhenia e 150 mije eurove per Sali Caken
*Ylvi Beqaj
*Sali Caka
/Opinion.al
