Për shkak të mbajtjes nën kontroll të pandemisë Covid-19, Greqia ka shtyrë sërish hapjen e kufijve tokësore me Shqipërinë. Drejtoria Vendore e Kufirit dhe Migracionit Korçë njofton se hyrjet dhe daljet e shtetasve nga pika kufitare e Kapshticës, nuk do të ndryshojnë deri në datën 7 qershor.
Në drejtim të Greqisë do të lejohet hyrja e shtetasve shqiptarë, me statusin e punëtorit sezonal përgjatë intervalit kohor nga ora 08:00-16:00. Këta shtetas do t’i nënshtrohen një testi të shpejtë COVID-19, pranë palës greke në këtë pike kalimi.
Ndërsa kuota ditore e pranimit vijon të jetë 400 persona, të cilët duhet të plotësojnë formularin e regjistrimit PLF në adresën http://www.travel.gov.gr dhe pasi të kenë marrë konfirmimin, mund të lejohen që të hyjnë në tokën greke.
Asnjë kategori tjetër nuk do të lejohet të hyjë drejt Greqisë (shërbim taxi, mjete të tonazhit të rëndë apo shtetas me leje qendrimi, shtetas grekë apo europianë të tjerë).
Ndërsa dalja nga Greqia dhe hyrja drejt vendit tonë, do të jetë e lejuar nga ora 06:00 deri në orën 22:00, për të gjithë shtetasit dhe kategoritë e mjeteve./Opinion.al
